MICAL

[nalabit, Siasino ti kas iti Dios?].

Ub-ubing nga anak ni Ari Saul a nagbalin nga asawa ni David. Ti in-inauna nga anak ni Saul a ni Merab ket naitukonna idin ken David kas asawa ngem sabali a lalaki ti nangyasawaanna. Nupay kasta, “nagayat [ni Mical] ken David,” ket intukon ni Saul nga agbalin nga asawa ni David no la ket makaiyeg iti makinsango a kudil ti sangagasut a Filisteo. Pagarupen ngamin ni Saul a matay ni David no gandatenna ti mangpapatay iti kasta kaadu a mannakigubat a kabusor. Inawat ni David dayta a karit, ket nangyeg ken Saul iti 200 a makinsango a kudil dagiti Filisteo, isu a naited kenkuana ni Mical nga agbalin nga asawana. Ngem kalpasan dayta, “narikna . . . ni Saul ti ad-adda pay a buteng gapu ken David” ket nagbalin a kabusorna iti napaut a tiempo. (1Sm 14:49; 18:17-29) Kalpasanna, idi nakaro unayen ti gura ni Saul ken David, tinulongan ni Mical ni David tapno maliklikanna ti pungtot ti ari. Bayat ti nabayag a kaawan ni David, ni Mical ket inyasawa ni Saul ken Palti nga anak ni Lais manipud Galim.​—1Sm 19:11-17; 25:44.

Idi pagregreggetan ni Abner ti makitinnulag ken David, nagkedked ni David nga agsarakda malaksid no ikuyogna ni Mical. Babaen ti mensahero, indatag ni David ti kalikagumna iti anak ni Saul a ni Is-boset, ket innalada ni Mical manipud iti asawana a ni Paltiel (Palti) kalpasanna naisubli ken David.​—2Sm 3:12-16.

Nadusa Gapu iti Kaawan Panagraemna ken David. Idi a kas maysan nga ari, imbilin ni David a maipan idiay Jerusalem ti lakasa ti tulag ket nagsalasala kas panangipakitana iti rag-ona maipaay iti panagdaydayaw ken Jehova, bayat a “sibabarikes . . . iti efod a lienso,” binuybuya ni Mical manipud iti tawa ket “rinugianna nga umsien iti pusona.” Idi nakasublin ni David iti sangakabbalayanna, inyebkas ni Mical ti rikriknana babaen iti makasair a sasao, nga impakitana ti kaawan panangipategna iti kinaregta nga imparangarang ni David maipaay iti panagdaydayaw ken Jehova ken impasimudaagna nga imbilangna a nakababain ti inaramid ni David. Idin tinubngar ni David ken nabatad a saannan a dinennaan ni Mical kas dusana isu nga awan ti anak ni Mical agingga a natay.​—2Sm 6:14-23.

Inaywananna ti Annak ti Kabsatna. Dakamaten ti salaysay iti 2 Samuel 21:8 nga adda “lima nga annak ni Mical nga anak a babai ni Saul nga impasngayna ken Adriel,” a nairaman dagitoy kadagiti kameng ti sangakabbalayan ni Saul nga inyawat ni David kadagiti Gabaonita kas pangabbong iti pananggandat ni Saul a mangtalipupos kadakuada. (2Sm 21:1-10) Tapno marisut ti kasla di panagtunos ti 2 Samuel 21:8 ken 2 Samuel 6:23, a mangipakpakita a natay ni Mical nga awanan anak, makatulong ti kapanunotan ti dadduma a komentarista, a dagitoy nga ubbing ket isuda dagiti lima nga annak ni Merab a kabsat ni Mical, ket ni Mical ti nangpadakkel kadakuada kalpasan ti nasapa nga ipapatay ti inada.​—Kitaenyo ti MERAB.