AHIMAAZ

1. Ama ni Ahinoam nga asawa ni Saul.​—1Sm 14:50.

2. Anak ti padi a ni Sadok ken ama ni Azarias. (1Cr 6:8, 9, 53) Idi nagrebelde ni Absalom iti amana a ni David ken inagawna ti trono, napateg ti akem ni agtutubo nga Ahimaaz iti pannakayallatiw ti impormasion maipaay ken David. Iti maysa a gundaway, idi ngannganida natiliw, isu ken ti kaduana naglemmengda iti maysa a bubon, a ti ngarabna nalingdan iti bukbukel nga inkabil ti maysa a babai. (2Sm 15:27, 36; 17:17-21) Idi a ni Absalom napapatay, napili ti maysa a Cusita a tumataray a mangipan iti damag ken David. Impapilit ni Ahimaaz a mapalubosan met koma nga agtaray. Idi napalubosan, inunaanna ti immuna a tumataray ket idi sumungsungaden iti siudad, isu nailasin babaen ti estilo ti panagtarayna. “Naimbag a lalaki daytoy, ket umay nga addaan naimbag a damag,” inyebkas ni David. Kasta nga agpayso; impakaammo ni Ahimaaz ti naimbag a damag ket ti laengen dakes a damag ti natda nga idanon ti maikadua a tumataray. (2Sm 18:19-32) Saan a masigurado no ni Ahimaaz ket nagbalin a nangato a padi. Isingasing ti dadduma a mabalin nga immun-una a natay ngem ni amana, iti kasta ti anakna a ni Azarias ti nangsuno ken Sadok.​—1Ar 4:2; 1Cr 6:8-10.

3. Asawa ni Basemat nga anak a babai ni Solomon, ken maysa kadagiti 12 a diputado a nadutokan a mangipaay iti taraon iti sangakabbalayan ti ari maysa a bulan iti makatawen, manipud iti teritoria ti Neftali. (1Ar 4:7, 15) Isingasing ti dadduma nga isu met laeng ti nadakamat iti Num. 2.