SADOK
[nagtaud iti sao a kaipapananna ti “agbalin a nalinteg”].
1. Maysa a padi a pagaammo unay a kadua ni Ari David. Ni Sadok ket kaputotan ni Aaron babaen ti linia ti nangato a padi a nagtaud ken Eleazar. (1Cr 6:3-8, 50-53) Naawagan met iti pumaparmata. (2Sm 15:27) Ni Sadok, kas maysa a maingel nga agtutubo a lalaki, ket maysa kadagiti panguluen ti tribu a simmuporta iti kinaari ni David. (1Cr 12:27, 28) Sipud idin, nagtultuloy a nasungdo ken David.—2Sm 8:15, 17; 20:25; 1Cr 18:16.
Karaman da Sadok ken Abiatar (no madakamatda a dua, umuna a mainaganan ni Sadok nalabit gapu ta mammadto pay) a nangiyeg iti lakasa ti tulag idiay Jerusalem idi imbilin dayta ni David. Kalpasanna, nagtultuloy a nagserbi ni Sadok iti sumagmamano a tiempo idiay Gabaon nga ayan idi ti tabernakulo. (1Cr 15:11, 14; 16:39) Idi nagrebelde ni Absalom, ti Lakasa ket intugot ni Sadok ken dagiti kakaduana a Levita idi kimmuyogda ken David a nagtalaw manipud Jerusalem. Ngem pinagsubli ida ni David idiay siudad, nga intudingna ni Sadok ken ti sabsabali pay tapno ipakaammoda no ania ti mapaspasamak sadiay. (2Sm 15:23-29, 35, 36; 17:15, 16; 18:19-27) Idi nagpatinggan ti panagrebelde ni Absalom, dakkel ti naaramidan da Sadok ken Abiatar tapno masigurado a maawat a nasayaat ni David idiay Jerusalem. (2Sm 19:11-14) Iti maudin a paset ti panagturay ni David, inorganisarna dagiti Levitico a panagserbi maipaay iti templo, ket agpada a timmulong kenkuana da Sadok ken Ahimelec nga anak ni Abiatar.—1Cr 24:3, 6, 30, 31.
Saan a kas ken Abiatar, saan a sinuportaran ni Sadok ti gandat ni Adonias a panangagaw iti trono. Gapu itoy, ni Sadok ti dinutokan ni David a mangpulot ken Solomon kas ari. (1Ar 1:7, 8, 26, 32-46) Bayat ti panagturay da Saul ken David, nagserbi ni Sadok kas katulongan laeng a padi. Ngem gapu iti kinasungdona, saan a kas iti nangato a padi a ni Abiatar a kimmappon iti sabali a dasig, ni Abiatar ket pinapanaw ni Solomon manipud Jerusalem ket pinagbalinna ni Sadok a nangato a padi. Kaitungpalan daytoy ti padto ni Jehova a naisawang maibusor iti balay ni Eli. (1Ar 2:26, 27, 35) Nalabit a ti pannakailanad ti sasao a “Sadok ken ni Abiatar” iti 1 Ar-ari 4:4 ket nainaig laeng iti pakasaritaan. Kunaen ni Josephus a ni Sadok ti kaunaan a nangato a padi iti templo ni Solomon. (Jewish Antiquities, X, 152 [viii, 6]) Iti 1 Cronicas 27:16, 17, nailista ni Sadok kas panguluen iti balay ni Aaron. Masarakan iti Biblia ti pammaneknek a ti linia ni Sadok ti nagakem kas nangato a padi agingga idi tiempo ni Dario a Persiano (nalablabit ni Dario II). (1Ar 4:2; 1Cr 6:8-15; 2Cr 31:10; Ne 12:22) Ti papadi a nakita ni Ezequiel iti nasirmatana a templo ket “annak ni Sadok.”—Eze 40:46; 43:19; 44:15; 48:11.
2. Apong ni Ari Jotam ti Juda iti dasig ti inana.—2Ar 15:32, 33; 2Cr 27:1.
3. Maysa a kaputotan ni Aaron a nagtaud ken Sadok (Num. 1) iti linia ti nangato a padi, ken inapo ti “nalaing a managkopia” a ni Esdras.—1Cr 6:3, 8, 12, 13; 9:11; Esd 7:1-6; Ne 11:11.
4. Maysa kadagiti nangtarimaan iti pader ti Jerusalem kalpasan ti pannakaidestiero; anak ni Baana. (Ne 3:4) Mabalin a daytoy a Sadok (wenno ti maysa a pannakabagi ti maysa a pamilia a kasta met laeng ti naganna) ti nangpirma iti tulag ti nasion a naisingasing idi agangay.—Ne 9:38; 10:1, 14, 21.
5. Sabali pay a tao a timmulong a nangtarimaan iti pader ti Jerusalem; anak wenno kaputotan ni Immer, a mabalin a kameng iti pamilia ti papadi.—Ne 3:29.
6. Maysa a managkopia a pinarebbengan ni Nehemias nga agaywan kadagiti pagipempenan dagiti Levita, a kaduana da Selemias ken Pedaias. (Ne 13:13) Nalabit isu met laeng ti Num. 5.
7. Inapo ni Jose a pannakaama ni Jesus; nagbiag kalpasan ti pannakaidestiero.—Mt 1:14