ACRABBIM

[Dagiti Manggagama].

Agpangato a bakras wenno sasang-atan iti abagatan a daya a beddeng ti Juda a nagbalin a maysa a beddeng idi nabingaybingay ti Canaan maipaay iti Israel. (Nu 34:4; Uk 1:36) Adda dayta iti agarup 29 km (18 mi) iti abagatan-a-laud ti makin-abagatan nga ungto ti Natay a Baybay ken iti asideg ti Let-ang ti Zin. Ti lugar ket maikunkuna nga isu ita ti Naqb es-Safa (Maʽale ʽAqrabbim), a sadiay ti dalan manipud Beer-seba agingga iti Araba dagus a sumalog iti Wadi Murra (Nahal Zin). Mabalin a nagtaud daytoy a nagan iti kinaruay dagiti manggagama iti daytoy a desierto a lugar wenno nalabit iti maulit-ulit a panagkurba ti kalsada a kas iti ipus ti maysa a manggagama. Nabatad a maysa dayta a kadaanan a ruta a naaramat iti isasalog iti Edom ken iti abagatan nga agturong iti ʽAqaba iti Gulpo ti ʽAqaba.