ALAMOT

[Babbalasang; Agtutubo a Babbai].

Nabatad a maysa a termino iti panagtokar ti musika. Nalabit tumukoy kadagiti soprano a timek ti babbalasang wenno ti falsetto ti babbaro. Iti 1 Cronica 15:20, nadeskribir dagiti pagtokar nga adda kuerdasna kas “nayayug iti Alamot,” dayta ket letra-por-letra a pannakaipatarus ti termino. Nupay kasta, iti superskripsion ti Salmo 46 naipatarus ti ʽala·mohthʹ a “Babbalasang.”

Iti 1 Cronicas 15:21, ti bersikulo a sumaruno iti teksto iti ngato, adda sabali pay a termino ti musika a letra-por-letra a naipatarus nga isu ti shemi·nithʹ, tumukoy dayta kadagiti “arpa a nayayug iti Seminit.” Kadagiti superskripsion ti Salmo 6 ken 12, naipatarus a “makimbaba nga oktaba” daytoy a sao. Nupay ti dua a termino nga Alamot ken Seminit ket mabalin a saan nga agkasungani ti kaipapananda, patien ti sumagmamano nga eskolar nga agsupadida. Ti linaon dagiti nadakamat a salmo agparang a kastoy met ti ipatuldoda: Medio naladingit ti dua a salmo (6 ken 12) a naglaon iti shemi·nithʹ kadagiti superskripsionda ket ngarud mabuyogan iti nalidliday, nababbaba a tono; idinto ta ti Salmo 46 a naglaon iti ʽala·mohthʹ iti superskripsionna ket naragsak ken rumbeng a mabuyogan wenno makanta iti nangatngato a tono.​—Kitaenyo ti ARPA; MUSIKA.