SEMINIT

Nupay ti literal a kayulogan daytoy a termino iti musika ket “maikawalo,” saan a masigurado ti eksakto a kaipapananna. Mabalin a tumukoy iti maysa a tono ti musika, wenno ayug, ti makimbaba a tono, ket no inaig ti aniaman a pagtokar iti musika iti daytoy a termino, nalabit tumukoy kadagidiay maar-aramat a pangtokar kadagiti nababa a tono iti eskala ti musika.

Iti 1 Cronicas 15:21, dagiti arpa naikuna a “nayayug iti Seminit [“mabalin a tumukoy iti maikawalo a nota wenno makimbaba nga oktaba,” Rbi8 ftn; “nalabit ti nababa nga oktaba,” Da ftn z].” Agpada a mabasa kadagiti superskripsion ti Salmo 6 ken 12 (a dagitoy a salmo panglidayen): “Iti mangiwanwanwan (kadagiti pagtokar nga adda kuerdasna) iti makimbaba nga oktaba [shemi·nithʹ],” a nalabit mangipatuldo a dagitoy a kanta ket masapul a madanggayan iti musika a nababbaba ti tonona ken makanta a maibuyog iti dayta.​—Kitaenyo ti ALAMOT.