AMATISTA

Medio napateg a kita ti quartz a napagbalin a kristal, purpura wenno murado ti marisna ken naaramat maipaay iti alahas. Agparang iti porma nga innem sikiganna a kriskristal, ket ti maris gapuanan dagiti lamma ti manganese wenno landok. Ti maysa a kita ti amatista isu ti quartz a kita (Lumaud), idinto ta ti napateg nga amatista (Dumaya) ket kita ti corundum wenno safiro. Ti nagan nga amatista naala iti Griego a sao nga a·meʹthy·stos (kaipapananna ti “saan a mangbartek”), a naaramat iti Griego a Septuagint a pangipatarus iti Hebreo a sao nga ʼach·la·mahʹ iti Exodo 28:19 ken 39:12.

Ti nangato a padi ti Israel nagaruat iti amatista a bato iti maikatlo a saad ti maikatlo nga intar ti batbato iti ar-aramatenna a nabordaan a “pektoral ti panangukom.” (Ex 28:2, 15, 19, 21; 39:12) Iti pannakasirmatana iti “Baro a Jerusalem,” napaliiw ni Juan a ti maika-12 a pamuon ti pader ti nasantuan a siudad ket amatista.​—Apo 21:2, 10, 19, 20.