SAFIRO

Aganninaw wenno aganninag a napateg a bato; maysa a kita ti corundum. Nupay agparang nga adu ti maris dagiti safiro, ad-adda a matarigagayan dagiti natayengteng nga asul a safiro. Nabatad nga asul dagiti safiro a natukoy iti Biblia.

Maysa ti safiro kadagiti bato iti “pektoral ti panangukom” ti nangato a padi.​—Ex 28:15-18; 39:11.

Ni Job, a nagbiag idi agarup maika-17 a siglo K.K.P., dineskribirna ti panagregget ti tattao iti panagkalida iti uneg ti daga tapno agminasda iti balitok ken napapateg a saniata, ket dinakamatna ti safiro kas karaman kadagiti natakkon a bato a nasarakanen. Ngem nupay ti sirib ket napateg kas iti safiro ken narigat a magun-odan, kinuna ni Job nga adayo a napatpateg ti sirib ken saan a mabayadan iti kasta a batbato.​—Job 28:4-6, 12, 16.

Piguratibo nga Usar. Ti narimat a kinapintas, kasta met ti makaay-ayo, makaawis, ken makakayaw nga epekto ti panangmatmat kadagiti napateg a saniata, ket piguratibo a nausar mainaig kadagiti sirmata iti dayag ti Dios. Kalpasan a naipasdek ti Linteg ti tulag, da Moises, Aaron, Nadab, Abihu, ken ti 70 kadagiti lallakay ti Israel nasirmatada ni Jehova, ket iti baba ti saka ni Jehova “adda idi ti kasla maysa nga aramid a safiro a daldalumpinas ken kasla ti mismo a langlangit iti kinasudi.” (Ex 24:8-11) Kadagiti sirmata ti dayag ni Jehova, namindua a nakita ni Ezequiel ti “umasping iti maysa a trono” a “kasla bato a safiro.”​—Eze 1:1, 26-28; 10:1-4.

Kas asawa a Makinkukua iti Sion, dinakamat ni Jehova ti pannakaisubli ken pannakapapintas ti Sion, a kinunana: “Isaadkonto ti pamuonmo babaen kadagiti safiro.” (Isa 54:5, 11) Umasping iti dayta, idi nasirmata ni apostol Juan ti nailangitan a Baro a Jerusalem, naipalgak a safiro ti maysa kadagiti pamuon daytoy a siudad.​—Apo 21:2, 19.