ASIMA

Maysa a didiosen a nagdaydayawan ti tattao a taga Hamat. Ti ari ti Asiria pinagyanna dagitoy a tattao idiay Samaria kalpasan a kinautibona dagiti Israelita. (2Ar 17:24, 30) Sigun iti Talmud ti Babilonia (Sanhedrin 63b), nairepresentar ni Asima kas awanan dutdot a kalakian a kalding. Gapu itoy, ti sumagmamano innaigda ni Asima ken Pan, maysa a dios ti kinabunga mainaig iti panagpastor. Naisingasing pay a ti nagan nga Asima ket mabalin nga inggagara a panangbalbaliw iti “Asera” (Canaanita a diosa ti kinabunga) tapno mainaig iti Hebreo a sao nga ʼa·shamʹ (“basol”; Ge 26:10). Nupay kasta, malaksid iti linaon ti Biblia awanen ti mapagtalkan nga impormasion mainaig iti dayta.