HAMAT
1. Ti “ama” ti balay ni Recab ken inapo ti sumagmamano a Keneo.—1Cr 2:55.
2. [Disso ti Napudot (nga Ubbog)]. Maysa a nasarikedkedan a siudad ti Neftali. (Jos 19:32, 35) Kaaduanna a maikunkuna nga isu ti Hammam Tabariyeh (Hame Teveriya), iti abagatan laeng ti Tiberias iti makinlaud a deppaar ti Baybay ti Galilea. Ti addaan asupre nga ubbog sadiay ti nalabit makagapu a napanaganan dayta iti Hamat. No ti Hammot-dor (Jos 21:32) ken Hammon (1Cr 6:76) ket nagnagan met laeng daytoy a lugar, kas patien ti kaaduan nga eskolar, ti Hamat nagpaay met kas siudad dagiti Levita.
3. Ti siudad ti Hamat isu ti kabesera ti bassit a Canaanita a pagarian idiay Siria bayat ti nasapa a paset ti pakasaritaan ti Israel. Kasta met laeng ti nagan ti nadam-eg nga agrikultural a rehion a nanglikmut iti dayta. Bayat dagidi tiempo dagiti Griego ken Romano, ti klasikal a nagan ti siudad ket Epiphania, nga impanagan ni Antiochus IV (Epiphanes). Ita maawagan dayta iti Hama, napaababa a porma ti orihinal a naganna.
MAPA: Hamat
Ti siudad ti Hamat ket masarakan iti Karayan Orontes, iti igid dagiti napateg a ruta ti komersio, 81 km (50 mi) manipud igid ti Mediteraneo, agarup 190 km (118 mi) iti amianan ti Damasco ken agarup 120 km (75 mi) iti abagatan ti Aleppo.
Nupay no dadduma naikuna a namunganay kadagiti Heteo, mabalbalin a ti Hamat ket imbangon dagiti Hamateo, kakabagian dagiti Heteo ken maysa kadagiti 70 a pamilia kalpasan ti Layus. Da Het ken Hamat nga inapo dagitoy dua a linia ti pamilia ket nailista kas maika-2 (Het) ken maika-11 (Hamat) nga anak ni Canaan nga anak ni Ham.—Ge 10:6, 15-18; 1Cr 1:8, 13-16; kitaenyo ti HETEO, DAGITI.
“Seserkan ti Hamat.” Ti kadadaanan a salaysay nga adda kadatayo maipapan iti Hamat dakamatenna no kasano a ti 12 nga Israelita a managsimisim idi maika-16 a siglo K.K.P. simmang-atda iti abagatan agingga iti “seserkan ti Hamat,” ti masansan a maulit-ulit a sasao a naipagarup a tumukoy, saan a kadagiti ruangan ti mismo a siudad no di ket, iti makin-abagatan a beddeng ti teritoria a nagturayan dayta a siudad. (Nu 13:21) Ditoy ti nagpatinggaan ti panagparmek ni Josue iti amianan. (Jos 13:2, 5; Uk 3:1-3) Nupay kasta, kunaen ti dadduma nga eskolar a ti ebkas nga “agingga iti seserkan ti Hamat” (Jos 13:5) ket naisurat koma kas “agingga iti Lebi-hamat (Leon ti Hamat),” ngarud maysa a piho a lugar dayta.—Kitaenyo ti Vetus Testamentum, Leiden, 1952, p. 114.
Saan a masinunuo ti eksakto nga ayan daytoy a beddeng (wenno lugar). Naibilang dayta kas makin-amianan a beddeng ti teritoria ti Israel (Nu 34:8; 1Ar 8:65; 2Ar 14:25; 2Cr 7:8) ken kas naibeddeng iti Damasco. (Jer 49:23; Eze 47:15-17; 48:1; Zac 9:1, 2) Adda dagiti mangipagarup a dayta idi ti makin-abagatan nga ungto ti Ginget Coele-Siria (naawagan met Beqaʽ), nga adda iti nagbaetan ti Libano ken ti kabambantayan ti Anti-Libano. Kuna ti dadduma nga adda dayta iti nagtengngaan ti Baalbek ken Ribla. Nupay kasta kunaen ti dadduma a dayta ket naam-amianan pay, a manipud sadiay ti bessang lumawa iti nagbaetan ti Homs ken ti baybay.—Eze 47:20.
Relasion iti Israel. Ni Toi (Tou) nga ari ti Hamat imbaonna ti anakna a ni Joram (Hadoram) a mangkablaaw ken Ari David gapu iti panangabakna iti kabusorda a ni Hadadezer. Ti Hamat ket maysa idi nga agwaywayas a pagarian. (2Sm 8:3, 9, 10; 1Cr 18:3, 9, 10) Nupay kasta, bayat ti panagturay ni Solomon, ti pagarian ti Hamat agparang nga inturayan ti Israel, ta nangibangon ni Solomon kadagiti siudad a pagidulinan iti dayta a rehion. (2Cr 8:3, 4) Kalpasan ti ipapatay ni Solomon, nagun-od ti Hamat ti wayawayana ket nagtultuloy nga agwaywayas malaksid iti ababa a periodo idi maikasiam a siglo K.K.P., idi a ni Jeroboam II temporario nga inturayan manen dayta ti Israel. (2Ar 14:28) Mabalbalin nga iti daytoy a tiempo nadeskribir dayta kas “aduan umilina a Hamat.”—Am 6:2.
Idi maikawalo a siglo K.K.P., ti Hamat ken dagiti kabangibangna, a pakairamanan ti sangapulo-tribu a pagarian ti Israel, ket sinakup dagiti Asirio iti pananggun-odda iti panangituray iti lubong. Pagannurotan ti Asiria a pagsisinnukaten dagiti kautibona ken iyakar dagita, ket gapuna dagiti umili ti Hamat naisukatda kadagiti agnanaed iti Samaria, a dagitoy met ti nayakar idiay Hamat ken iti dadduma pay a lugar. (2Ar 17:24; 19:12, 13; Isa 10:9-11; 37:12, 13) Kadagiti nangato a disso ti Samaria, nangipasdek dagiti Hamateo iti ladladawan ti diosda a ni Asima, nupay daytoy awan pategna a dios saanna a nalapdan dagiti Asirio.—2Ar 17:29, 30; 18:33, 34; Isa 36:18, 19.
Sigun iti adda pay laeng a cuneiform a kitikit (British Museum 21946), kalpasan ti panagdadangadang idiay Carquemis idi 625 K.K.P. (Jer 46:2), kinamakam ken dinadael dagiti puersa ni Nabucodonosor dagiti agtaltalaw nga Egipcio iti distrito ti Hamat. (Assyrian and Babylonian Chronicles, ni A. K. Grayson, 1975, p. 99) Iti daytoy met laeng a lugar, sumagmamano a tawen a nasapsapa, ni Faraon Necoh nakautibona ni Ari Jehoacaz. (2Ar 23:31-33) Kalpasanna, iti pannakarba ti Jerusalem idi 607 K.K.P., ni Zedekias ken ti dadduma pay a kautibo naipanda idiay Ribla iti rehion ti Hamat, ket sadiay a napapatay iti imatangna dagiti annakna, agraman ti sabsabali pay a natan-ok a tattao. (2Ar 25:18-21; Jer 39:5, 6; 52:9, 10, 24-27) Nupay kasta, inkari ti Dios nga iti naikeddeng a tiempo isublina ti natda iti nakautibo nga ilina, agraman dagidiay adda iti daga ti Hamat.—Isa 11:11, 12.