ARPAD

Naarian a siudad ti makin-amianan a paset ti Siria a kankanayon nga inaig ti Biblia iti siudad ti Hamat. Ti Arpad ket naikuna nga isu ti Tell Erfad (Tell Rifʽat) agarup 30 km (19 mi) iti amianan nga amianan-a-laud ti Aleppo. Gapu ta nagsaad dayta iti kalsada nga agturong iti abagatan ti Hamat ken Damasco, masansan idi a rauten dagiti Asirio ket idi agangay pinarmek ni Tiglat-pileser III ken idi kamaudiananna pinarmek met ni Sargon II. Ngarud idi a ti anak ni Sargon a ni Senaquerib ipangpangtana ti Jerusalem idi 732 K.K.P., imbilinna iti pannakangiwatna a ni Rabsaque a dakamatenna ti napagteng ti Arpad kas pammaneknek a saan a kabaelan ti didios dagiti nasion a sarkedan ti nabileg a pannakabalin ti Asiria. (2Ar 18:34; 19:12, 13; Isa 36:19; 37:12, 13) Nasaksakbay nga impadto ni mammadto Isaias ti kasta a panagpasindayag. (Isa 10:9) Idi agangay impadto ni Jeremias a ti Hamat ken Arpad mabainan ken mawarawarada gapu iti “maysa a dakes a damag,” nabatad a maipapan dayta kadagiti panagparmek ni Ari Nabucodonosor ti Babilonia.​—Jer 49:23.