CALNE

1. Maysa a siudad nga imbangon ni Nimrod iti daga ti Sinar. (Ge 10:10) Nabatad ngarud nga adda iti makin-abagatan a Mesopotamia, ngem di masinunuo ti ayanna. Sigun iti Talmud ken iti dadduma pay a makagapu, nabayagen a maikunkuna a masarakan ti Calne iti kadaanan a siudad ti Nippur nga agarup 85 km (50 mi) iti abagatan a daya ti Babilonia. Nupay kasta, kaykayat ti sumagmamano nga eskolar nga inaig dayta iti Kulunu, ti nagkauna a nagan ti maysa a napateg a siudad iti asideg ti Babilonia. Ti maikatlo a posibilidad isu ti Hursagkalama (ti kasingin a siudad ti Kish), a ti naud-udi a paset ti naganna (-kalama) ket naipagarup nga irepresentarna ti Calne. Ti sumagmamano a patarus (RS, JB, NE) ipatarusda ti Calne kas “isuda amin,” imbes a kas nagan ti lugar, gapuna kastoy ti pannakabasa ti teksto, “Babel, Erec, ken Accad, isuda amin iti daga ti Sinar.” Nupay kasta, kalikaguman daytoy ti pannakaatur ti marka ti bokales iti Masoretiko a teksto.

2. Lugar a dinakamat ni mammadto Amos, agraman dagiti siudad ti Hamat ken Gat, idi pinakdaaranna dagiti umili ti Israel ken Juda maipapan iti um-umay a didigra. (Am 6:2) Ti sumagmamano a komentarista ibilangda nga isu met laeng dayta ti Num. 1 iti ngato. Nupay kasta, yantangay nadakamat a kadua ti Hamat ken Gat, ipapan ti kaaduan nga eskolar a ti Calne ket tumukoy iti maysa a lugar iti rehion a kaparanget ti makindaya a paset ti Baybay Mediteraneo, imbes nga iti Mesopotamia. Kunaenda nga isu dayta ti Kullani iti Asirio a kitkitikit iti makin-amianan a Siria (nalawag nga irepresentar ti moderno a Kullan Köy, agarup 16 km [10 mi] iti abagatan a daya ti Arpad), a dinakamat ni Tiglat-pileser III kas karaman kadagiti lugar a naparmek bayat ti maysa nga Asirio a kampania militar iti laud. No umiso daytoy, ti Calne ditoy mabalin ngarud nga isu met laeng ti Calno iti Isaias 10:9.