CALNO

Siudad a nailanad iti padto ni Isaias mainaig iti panangipasindayag dagiti Asirio kadagiti panagparmekda ken iti kinaubbaw ti panangpadas a mangsaranget iti bilegda. (Isa 10:5, 9-11) Kaaduan nga eskolar ibilangda ti Calno kas sabali pay nga ispeling ti Calne. (Am 6:2) Ti pannakadakamat ti Calno mainaig iti Carquemis ket maitunos iti panangikuna a ti Calne isu ti Kullani kadagiti Asirio a teksto, lugar a masarakan iti nagbaetan ti Carquemis ken Aleppo. Ti Kullani ket pinarmek ni Tiglat-pileser III, maysa a kapanawenan ni Ari Menahem ti Israel.