ATALIA

[Ken (Kukua ni) Attalus].

Iti panagngudo ti umuna a panagdaliasat ni Pablo kas misionero, limmugan manipud pagsangladan nga ili ti Atalia nga adda iti igid ti baybay ti Pamfilia idiay Asia Menor, nga agturong iti Antioquia idiay Siria, agarup 500 km (300 mi) ti kaadayona.​—Ara 14:24-26.

Ti Atalia, agdama nga Antalya, ket imbangon ni Attalus II, ari ti Pergamo (159-138 K.K.P.), iti wangawangan ti Karayan Cataractes. Nagbalin dayta a kangrunaan a puerto ti probinsia ti Pamfilia, a nagserbi a pagiruaran maipaay iti nabaknang a makin-uneg a rehion ti makin-abagatan a laud a Frigia ken maysa a disso a gagangay a pagluganan manipud makintengnga nga Asia Menor nga agturong iti Siria ken Egipto. Nupay idi damo daytoy ket nagserbi a puerto ti kabangibang a siudad ti Perga, nga agarup 13 km (8 mi) nga agpauneg manipud aplaya, idi kaaldawan dagiti apostol nagbalinen a napatpateg ti Atalia ngem iti dayta a siudad.