PANNIKI

[Heb., ʽatal·lephʹ].

Agtayab a mamalia a, malaksid kadagiti dadakkel a payakna a kasla kulapot a kudil, umarngi iti marabutit. Ti Kasuratan ibilangna ti panniki a karaman kadagiti narugit nga agtaytayab a parsua a saan a kanen dagiti Israelita. (Le 11:19; De 14:18) Adda agarup 20 a nadumaduma a kakikita dagiti panniki (Chiroptera) a masarakan iti Israel ita.

Bayat dagiti oras iti aldaw, gagangay nga agapon dagiti panniki a pabalinsuek dagiti uloda kadagiti nasipnget a rukib wenno nagpanawan a patpatakder, kalpasanna rummuarda no sumipngeten tapno aganupda iti taraon bayat dagiti oras ti kinasipnget. Iti maysa a lugar a pagaponan ti dakkel a bilang kadakuada, adda makapasugkar, agat-marabutit nga angot. Iti sumagmamano a rukib, pamuskolen ti panagsusukot dagiti naurnong nga ibleng dagiti panniki, a mangipaay iti napateg a gubuayan ti ganagan. Awan duadua a gapu iti ugali ti panniki nga agapon kadagiti nasipnget a lugar a ni mammadto Isaias sawenna ti panangipuruak kadagiti didios a balitok ken pirak kadagiti panniki. Maysa a lugar ti kinasipnget ken kinarugit ti pakaikarian laeng dagiti kasta nga idolo, imbes a kadagiti lugar ti dayaw ken kinatan-ok nga impaay kadakuada dagiti naallilaw a managdaydayawda.​—Isa 2:20.