BET-HARAN, BET-HARAM

Maysa a siudad iti makindaya a deppaar ti Jordan iti teritoria a kiniddaw ti tribu ni Gad gapu iti nasayaat a pagpaaraban sadiay. Mabalin nga imbangon wenno tinarimaan dayta dagiti Gadita, ket nupay nagsaad iti maysa a nababa a tanap, nagbalin a maysa kadagiti nasarikedkedan a siudadda.​—Nu 32:1, 34, 36; Jos 13:27.

Agparang a ti nagan nataginayon iti nagan ti Tell er-Rameh iti Wadi er-Rameh (Wadi Husban) nga adda iti Tantanap ti Moab, ngem ti orihinal nga ayan ti Bet-haran (Bet-haram) ket maikunkuna nga isu ti Tell Iktanu, agarup 13 km (8 mi) iti daya nga amianan-a-daya ti lugar a sumrekan ti ayus ti Jordan iti Natay a Baybay. Ti disso ket asideg iti maysa a gubuayan dagiti agdindinamag a napudot nga ubbog, a mabalin a maysa a makagapu no apay a nagpaibangon sadiay ni Ari Herodes iti maysa a palasio. Iti umuna a paset ti Kadawyan a Panawen, ti disso ti Tell er-Rameh ket pagaammo kas Livias (nagan nga inyawag ni Herodes Antipas) ngem idi agangay napanaganan iti Julias.