BET-PEOR

[Balay ti Peor].

Iti maudi a tawen ti panagdaliasatda idiay let-ang, nagpakarso ti nasion ti Israel “iti ginget iti sanguanan ti Bet-peor.” (De 3:29) Ti Bet-peor ket mabalin a maysa nga ili nga adda kadagiti darisdis ti Peor. Ti bantay ken ti ili mabalin nga agpada a nainaig unay iti panagdaydayaw ken “Baal ti Peor.” Kas nailanad iti Numeros 25:1-9, nasiluan dagiti Israelita babaen kadagiti imoral a seremonia a nainaig iti kasta a panagdaydayaw.​—Kitaenyo ti BAAL TI PEOR.

Idiay Tantanap ti Moab, iti rehion ti Jordan, inulit ni Moises a dinakamat ti Linteg iti Israel, ket kalpasanna idiay “ginget iti daga ti Moab iti sanguanan ti Bet-peor” ti nakaitabonan ni Moises. Ngarud ti Bet-peor ket adda iti “daga ti Moab,” ti daga a nagyanan dagiti Moabita, ngem iti teritoria a nabiit pay nga inturayan ni Ari Sihon dagiti Amoreo, agingga nga isu ket pinarmek ti nasion ti Israel. (De 4:46; 34:6) Idi agangay naituding dayta iti tribu ni Ruben, a nadakamat a kadua “dagiti darisdis ti Pisga ken ti Bet-jesimot.”​—Jos 13:15, 20.

Ipatuldo amin dagitoy a teksto ti maysa a lugar iti asideg ti makin-amianan a daya nga ungto ti Natay a Baybay ken nakasango iti Tantanap ti Moab. Saan a masigurado ti eksakto nga ayanna. Nupay kasta, tinukoy ni Eusebius ti kasta a disso nga adda iti agarup innem a Romano a milia (9 km; 5.5 mi) iti daya ti Livias (agdama a Tell er-Rameh). (Onomasticon, 48, 3-5) Maibatay kadagitoy a kunaen ti dadduma nga isu dayta ti Khirbet esh-Sheikh-Jayil agarup 5 km (3 mi) iti laud nga amianan-a-laud ti maikunkuna a lugar ti Bantay Nebo. Adda daytoy a lugar iti darisdis ti maysa a tapaw a mabalin nga isu ti “Peor” ti maudi a disso a nakaipanan ni Balaam tapno ilunodna ti Israel. No umiso ti lugar a nadakamat iti ngato, ngarud ti “ginget iti sanguanan ti Bet-peor” nalabit isu ti Wadi Husban.​—Nu 23:28; De 4:46; kitaenyo ti PEOR.