PEOR

Ti “tapaw ti Peor, a tumannawag iti Jesimon” ti maikatlo a nangato a disso a nakaipanan ni mammadto Balaam tapno ilunodna ti Israel, kas dakamaten ti salaysay maipapan iti panagregget ni Ari Balak a mangilunod iti dayta a nasion. (Nu 23:28) Manipud tapaw ti Peor, makita ni Balaam dagiti tolda ti Israel a naiwaras iti Tantanap ti Moab iti baba.​—Nu 22:1; 24:2.

Ibilang ti dadduma a ti Peor ket napaababa a porma ti nagan a Bet-peor. (De 4:46) Nupay kasta, nabatad a ti Bet-peor ket maysa nga ili, a nairaman iti teritoria a naituding ken Ruben. (Jos 13:15, 16, 20) Gapuna, ibilang ti dadduma a ti Peor ket maysa a tapaw, wenno alimpatok, ket kunaenda a mabalin a kasta ti nagan ti ili ti Bet-peor gapu ta adda daytoy kadagiti darisdis dayta a tapaw. Agpada a ti Peor ken Bet-peor ket nabatad a nainaig iti pagano a panagdaydayaw ken “Baal ti Peor” (Nu 25:1-3, 18; 31:16; Jos 22:17), ket posible a ti kangatuan a paset ti Peor ket sentro idi ti kasta nga imoral a panagdaydayaw.​—Kitaenyo ti BAAL Num. 4; BAAL TI PEOR.

Umuna a naipan ni Balaam idiay Bamot-baal, kalpasanna iti “tapaw ti Pisga,” ken kamaudiananna iti “tapaw ti Peor.” (Nu 22:41; 23:14, 28) Ti iyaakar ket manipud abagatan nga agpaamianan ken kasla ipasimudaagna nga adda ti Peor iti amianan ti Pisga ken Bantay Nebo. Sigun iti sasao da Eusebius ken Jerome a nagbiag idi maikatlo ken maikapat a siglo K.P., naikuna a ti tapaw ti Peor ket maysa kadagiti alimpatok a ti beddengna ket ti Wadi Husban.​—Kitaenyo ti BET-PEOR.