BETUEL

1. Kaanakan ni Abraham, putot ti kabsatna a ni Nacor babaen ken Milca. (Ge 22:20, 22) Ni Betuel ti ama da Rebecca ken Laban. (Ge 22:23; 24:15, 24, 29) Binigbigna idi agangay a gapu iti panangiwanwan ti Dios, ti adipen ni Abraham naiturong iti pagtaenganna idi agbirbirok iti asawa maipaay ken Isaac, a kunkunana, agraman ni Laban, “Nagtaud ken Jehova daytoy a banag.” (Ge 24:50) Naawagan Sirio wenno Aramaeano yantangay agnanaed iti patad a daga ti Aram.​—Ge 25:20; 28:2, 5.

2. Ti panamagdilig kadagiti naited a listaan ti il-ili iti Josue 15:30; 19:4 ken 1 Cronicas 4:30 ipasimudaagna a daytoy nga ili ket maawagan met iti Betul ken Kesil. Adda dayta iti makin-abagatan a paset ti teritoria ti Juda ngem naituding iti tribu ni Simeon kas naipasngat a siudad. Agparang met ngarud a dayta ti “Bethel” a natukoy iti 1 Samuel 30:27 kas maysa kadagiti lugar a nangipatulodan ni David kadagiti kapaset ti samsam kas sagut. Nupay saan a sigurado, maikunkuna nga isu ti Khirbet el-Qaryatein (Tel Qeriyyot), agarup 19 km (12 mi) iti abagatan ti Hebron; nupay ti dadduma paboranda ti Khirbet er-Ras (Horvat Rosh) nga agarup 24 km (15 mi) iti laud daytoy a disso.​—Kitaenyo ti KESIL.