BET-ZUR
[Balay ti Bato].
Maysa nga ili iti kabambantayan ti Juda a nailista iti nagbaetan ti Halhul ken Gedor. (Jos 15:58) Nataginayon daytoy a nagan iti Burj es-Sur, nupay impakita dagiti panagkabakab a ti aktual a disso ti kadaanan a siudad isu ti Khirbet et-Tubeiqeh (Bet Zur), agarup 0.5 km (0.3 mi) iti amianan a laud. Daytoy a disso ket 7.5 km (4.5 mi) iti amianan ti Hebron, nga ad-adayo ti Gedor iti agarup 5 km (3 mi) iti amianan nga amianan-a-laud ken ti Halhul 1.5 km (1 mi) iti abagatan nga abagatan-a-daya. Nadeskribir dayta kas maysa kadagiti kangatuan a narebbek nga ili idiay Palestina, ta nagsaad iti turod a 1,007 m (3,304 pie) ti kangatona manipud iti patar ti baybay. Estratehiko a lugar ti nagsaadan ti Bet-zur agsipud ta asideg iti kangrunaan a kalsada (manipud amianan nga agpaabagatan) a dumalan iti nangato a paset dayta a ruta ken agsipud ta sinaluadanna met dagiti ruta nga agturong iti Maresah ken Libna iti laud.
Kalpasan ti pannakabingay ti pagarian, maysa ti Bet-zur kadagiti 15 a siudad a tinarimaan ken pinatibker ni Ari Rehoboam tapno masalakniban ti Juda ken Benjamin manipud pannakaraut. (2Cr 11:5-12) Karaman dayta kadagiti siudad a pinagnaedan manen dagiti Judio a nagsubli manipud pannakaidestiero idiay Babilonia. (Ne 3:16) Bayat ti periodo dagiti Macabeo, addaan ti Bet-zur (a maaw-awagan idi iti Bethsura) iti dakkel a paset iti isasaranget dagiti Judio maibusor kadagiti Seleucido nga ar-ari ti Siria, a ti Apokripa a libro ti Umuna a Macabeo deskribirenna ti naisangsangayan a panagballigi sadiay ni Judas Macabeo maibusor kadagiti puersa ti Siria (165 K.K.P.), a kalpasan dayta pinatibkerna manen ti siudad. (1 Macabeo 4:61; 6:26) Idi 162 K.K.P. linakub dagiti Sirio daytoy a siudad, ket simmuko dayta kamaudiananna gapu iti kaawan ti abasto a taraon. (1 Macabeo 6:30-50) Nagbalin dayta a garison dagiti Sirio, ket pinatibker ni Heneral Bacchides dagiti sarikedked dayta.—1 Macabeo 9:52.
Kadagiti arkeolohikal a panagkabakab idiay Bet-zur idi 1931 ken 1957, naipalgak ti ebidensia nga adda idi nalalagda a sarikedked sadiay. Nasarakan ti adu a sinsilio a naaramid idi maikapat agingga iti maikadua a siglo K.K.P.; karaman kadagitoy dagiti pirak a sinsilio dagiti Judio a naikuna a naaramid idi panawen dagiti Persiano wenno idi agarup maikapat a siglo K.K.P.
Agparang ti nagan a Bet-zur iti maysa a listaan ti kaputotan dagiti annak ni Caleb a kabsat ni Jerameel iti 1 Cronicas 2:45. Naikuna sadiay a ni Maon isu ti “ama ni Bet-zur.” Ipapan ti adu a komentarista a ti Bet-zur ket maysa nga ili a kasta ti naganna, ket iti daytoy a kaso, ni Maon ti ama dagidiay aggigian sadiay, wenno nalabit ti panguluen wenno kangrunaan a tao iti dayta a siudad.