MAON

1. Kaputotan ni Caleb babaen ken Sammai. Mabalin a ni Maon ti ama dagiti agnanaed iti Bet-zur wenno ti kangrunaan a lalaki wenno nangbuangay iti dayta a siudad.​—1Cr 2:42, 45.

2. Maysa a siudad iti kabambantayan ti Juda. (Jos 15:20, 48, 55) Ni Ari Saul ti Israel nakadanon iti let-ang iti likmut ti Maon idi kamkamatenna ni David ken dagiti tattaona. Ngem idi naipadamag ken Saul a rimmubbuot dagiti Filisteo, napilitan a mangisardeng iti ikakamatna. (1Sm 23:24-28) Idi agangay, ti nabaknang a lalaki a ni Nabal nga agtagtagikua iti daga ken nalawag nga agnanaed idiay Maon sisasabrak a trinatona dagiti tattao ni David. (1Sm 25:2-11) Maikunkuna a daytoy a siudad isu ti Tell Maʽin (Horvat Maʽon [Bi-Yehuda]) iti tapaw ti maysa a nangato a turod nga agarup 13 km (8 mi) iti abagatan nga abagatan-a-daya ti Hebron.