BALAY A PAGIGALUTAN DAGITI PASTOR

Lugar iti dalan manipud Jezrael nga agturong iti Samaria a sadiay, iti sibay ti maysa a pagurnongan ti danum, sinabet ken pinatay ni Jehu ti kakabsat ni Ari Ocozias ti Juda. (2Ar 10:12-14) Nalawag nga ipasimudaag ti naganna ti maysa a balay a sadiay naigalut dagiti karnero tapno mapalaka ti trabaho a panagpukis. Ti sumagmamano a bersion ipatarusda ti behth-ʽeʹqedh kas “balay a pagdadanonan,” a mangipasimudaag iti maysa a pagdagusan a pagdadanonan ti “papastor” (ha·ro·ʽimʹ); ti dadduma ipatarusda lattan a letra-por-letra ti Hebreo a nagan, nga ibilangda dayta kas nagan ti maysa nga ili. Kadawyan a maikunkuna nga isu dayta ti Beit Qad (Bet Qad) agarup 6 km (3.5 mi) iti daya nga amianan-a-daya ti agdama a Jenin. Adda sumagmamano a pagurnongan ti danum iti daytoy a lugar.