CAUDA

Isla nga asideg iti makin-abagatan a laud a dapnis ti Creta a limmabasan da apostol Pablo ken Lucas iti panaglayagda nga agturong idiay Roma idi agarup 58 K.P. Idi naingato ti angkla idiay Nasayaat a Sasangladan, tinaraigid ti barkoda ti makin-abagatan a dapnis ti Creta agingga a, nalabit kalpasan a narikusda ti Rawis Matala, nasalapon ken induron ida ti nadawel unay nga angin a nangisadsad koma iti barangay kadagiti kurruoy iti asideg a takdang ti Amianan nga Africa. Nupay kasta, nakagtengda iti malingdan ti “maysa a bassit nga isla a maawagan Cauda” ket ti panagsaad ti isla nabatad a binurakna ti puersa ti angin, iti kasta nangipaay kadakuada iti nalinlinak a dandanum, nalabit iti makin-abagatan a laud nga igidna. Daytoy ti nangipaay kadagiti tripulante iti umdas a tiempo a mangisagpat iti bilog, mangpatibker iti sirok ti barangay, ken mangibaba iti alikamenna a paglayag.​—Ara 27:13-17.

Ti Cauda iti salaysay ni Lucas maaw-awagan ita iti Gavdos, maysa nga isla a 11 km (7 mi) ti kaatiddogna ken 5 km (3 mi) ti kaakabana, nga adda iti agarup 65 km (40 mi) iti laud nga abagatan-a-laud ti Nasayaat a Sasangladan.