DATILES

Ti bunga ti palma a datiles (Phoenix dactylifera), kayo a gagangay iti Palestina. Dagiti datiles ket arinduyog, nabagas, nasam-it ti ramanna, ken mangpataud iti maysa a bukel.

Iti salaysay ti Biblia, nadakamat laeng dagiti datiles iti saan a direkta a pamay-an. Kas pagarigan, ti balasang a Sulamita deskribirenna dagiti nangisit a tirintas ti buok ti kaayan-ayatna a pastor nga umasping iti “raraay ti datiles” (“nasamek,” KJ; Heb., tal·tal·limʹ; ‘sinar-ay a datiles,’ Lexicon in Veteris Testamenti Libros, da L. Koehler ken W. Baumgartner, Leiden, 1958, p. 1030). Inyasping ni Solomon ti taktakder ti balasang iti maysa a kayo a palma ket dagiti susona iti “raraay ti datiles” (“raraay ti ubas,” KJ) ken kadagiti ‘ungkay ti bunga a datiles’ (Heb., san·sin·nimʹ; kitaenyo ti Lexicon in Veteris Testamenti Libros, p. 662).​—Sol 5:11; 7:7, 8; kitaenyo ti PALMA, KAYO A.