DORCAS

[Gasela].

Maysa a Kristiano a babai iti kongregasion ti Joppe nga aglaplapusanan iti “naimbag nga ar-aramid ken sagsagut ti asi,” nabatad a pakairamanan ti panagaramidna iti makin-uneg ken makinruar a kawkawes nga agpaay kadagiti marigrigat a balo a babai. (Ara 9:36, 39) Ti “Dorcas” ket katupag ti Aramaiko a “Tabita,” a dagita a nagan kaipapananda ti “Gasela.” Mabalin a pagaammoda ni Dorcas kadagita a dua a nagan, ta saan a karkarna idi kadagiti Judio ti maaddaan iti Hebreo a nagan kasta met iti Griego wenno Latin a nagan, nangnangruna kadagidiay agnanaed iti pagsangladan kas ti Joppe nga addaan iti naglalaok a populasion a Judio ken Gentil. Wenno, mabalin nga impatarus ni Lucas ti nagan maipagapu kadagiti managbasa a Gentil. Ni Dorcas laeng ti babai a nadakamat iti Kasuratan a nakayaplikaran ti pangbabai a porma ti sao nga “adalan.” Nupay kasta, saan a kayat a sawen daytoy nga adda naisangsangayan a saadna iti kongregasion, ta iti kinapudnona amin a Kristiano ket adalan ni Jesu-Kristo. (Mt 28:19, 20) Nupay ti ipapatayna idi 36 K.P. ket nagladingitan iti kasta unay dagiti balo a babbai a nalawag a nagunggonaan unay kadagiti kinamanangngaasina, awan ti nadakamat a nagleddaang nga asawa a lalaki a mangipakita nga awan asawa ni Dorcas iti daydi a tiempo.

Idi natay ni Dorcas, insagana dagiti adalan idiay Joppe a maitabon, ngem idi naammuanda nga adda ni Pedro idiay Lidda, agarup 18 km (11 mi) iti abagatan a daya ti Joppe, pinaayabanda. Awan duadua a nangngegda ti maipapan iti panangpaimbag sadiay ni Pedro iti paralitiko a ni Eneas, ket mabalin a daytoy ti nangibatayanda a mangikuna a ti apostol mapagungarna ni Dorcas. Iti sabali a bangir, mabalin a kayatda laeng ti maliwliwa isu a pinaayabanda ni Pedro.​—Ara 9:32-38.

Kas panangtuladna iti inaramid ni Jesus idi pinagungarna ti anak a babai ni Jairo (Mr 5:38-41; Lu 8:51-55), pinapanaw ni Pedro ti amin nga adda iti makinngato a siled ket kalpasanna nagkararag sana kinunana: “Tabita, bumangonka!” Nagmulagat ni Dorcas, nagtugaw, sana iniggaman ti ima ni Pedro ket timmakder. Daytoy ti damo a naipadamag a panagungar nga inaramid ti maysa nga apostol, a daytoy ti makagapu nga adu ti nagbalin a manamati iti intero a Joppe.​—Ara 9:39-42.