ELASAR

Maysa a pagarian wenno siudad a ni Arioc ti agturay idi tiempo da Abraham ken Lot. (Ge 14:1) Ni Ari Arioc ti Elasar ket nakikappon kada Ari Amrafel ti Sinar, Kedorlaomer ti Elam, ken Tidal ti Goiim tapno gubatenda dagiti ar-ari dagiti agrebrebelde a siudad nga estado (Sodoma, Gomorra, Adma, Zeboiim, ken Bela, wenno Zoar) iti Nababa a Tanap ti Siddim, wenno Asin a Baybay. Naabak dagiti rebelde, ket ni Lot, nga agnanaed idi idiay Sodoma, nakautibo ken naipanaw a naiturong iti amianan. Nupay kasta, ti nagtitipon a puersa ti uppat nga ar-ari ket nakamakam ni Abram (Abraham) idiay Dan, a kaduana da Mamre, Aner, ken Escol kas kakapponna. Sadiay a napagtatarayna ida, isu a naagawna ni Lot ken dagiti umili ket binawina dagiti sanikua.​—Ge 14:1-16, 24.

Parikut pay laeng dagiti managsirarak no ti kadaanan nga Elasar ket pudno nga isu ti maysa a pagaammo a lugar iti agdama.