ELUL

Ti nagan ti maika-6 a lunar a bulan iti sagrado a kalendario dagiti Judio kalpasan ti pannakaidestiero, ngem maika-12 iti sekular idi a kalendario, a kaibatoganna ti maud-udi a paset ti Agosto agingga iti umun-una a paset ti Setiembre. Saan a masigurado no ania ti kaipapanan dayta a nagan.

Iti daytoy maudin a bulan iti panawen ti kalgaw, naluomen dagiti datiles, kasta met ti kaaduan a maapit a higos. Madaman ti sapasap a panagburas iti ubas, ket iti ngudo ti bulan agay-ayusen ti baro nga arak.​—Le 26:5; Nu 13:23; Jer 8:13.

Iti daytoy a bulan ti Elul a nairingpas ni Nehemias ti 52-aldaw a proyekto a panangibangon manen kadagiti pader ti Jerusalem. (Ne 6:15) Iti dadduma pay a paset ti Kasuratan, natukoy ti bulan nga Elul babaen laeng ti sasao a “maikanem a bulan.”​—1Cr 27:9; Eze 8:1; Hag 1:1, 15.

Dagiti tsart nga insagana da Parker ken Dubberstein, iti Babylonian Chronology, 626 B.C.–A.D. 75 (1971, p. 27-47), ipakitada a ti bulan nga Elul ket sagpaminsan nga inar-aramat dagiti taga Babilonia kas pasngat a bulan a kadua ti bulan nga Adar.