EPAFRAS

[pangababaan ti Epafrodito].

Maysa a matalek a ministro ni Kristo. Babaen ti panangikasabana iti naimbag a damag, insurona kadagiti taga Colosas ti maipapan iti di kaikarian a kinamanangngaasi ti Dios ket ngarud nalablabit naaramat iti pannakaipasdek ti kongregasion idiay Colosas. Idi tiempo ti umuna a pannakaibalud ni Pablo, immay ni Epafras iti Roma, a nangyeg iti makaparegta a damag maipapan iti ayat ken kinatibker ti kongregasion idiay Colosas. (Col 1:4-8) Nabatad a nagtalinaed idiay Roma, mabalbalin nga iti apagbiit, yantangay idi insurat ni Pablo ti suratna kadagiti taga Colosas, inramanna dagiti kablaaw ni Epafras ken impasiguradona kadakuada a daytoy nga adipen ni Jesu-Kristo kankanayon nga umag-agawa “iti karkararagna maigapu kadakayo, tapno iti kamaudiananna makapagtakderkayo a naan-anay ken addaan natibker a panamati iti isuamin a pagayatan ti Dios.” Kas paneknekan ni Pablo, daytoy a dungdungnguen a pada nga adipen nangaramid met iti dakkel a panagregget maigapu kadagiti kakabsat idiay Laodicea ken Hierapolis. (Col 4:12, 13) Kalpasanna, iti panagsuratna met ken Filemon, impatulod ni Pablo dagiti kablaaw ni Epafras ket isu tinukoyna kas “padak a kautibo a naikaykaysa ken Kristo.” (Flm 23) Saan koma a mapagkamalian a ni Epafras isu met laeng ni Epafrodito manipud Filipos.