ERASTO

[Dungdungnguen; Naslag].

1. Maysa a Kristiano a nagserbi ken Pablo iti maikatlo a panagdaliasatna kas misionero ken imbaon ni Pablo manipud Asia a mapan idiay Macedonia a kadua ni Timoteo. (Ara 19:22) Nalabit isu ti Erasto a nagtalinaed idiay Corinto idi tiempo nga insurat ni Pablo ti maikadua a suratna ken Timoteo.​—2Ti 4:20.

2. Ti mayordomo ti siudad ti Corinto a dagiti kablaawna inraman ni Pablo iti suratna kadagiti taga Roma. (Ro 16:23) Bayat dagiti panagkabakab idiay Corinto idi 1929, nakatakuat ni Propesor T. L. Shear iti maysa a dappat nga addaan iti Latin a kitikit, a pakabasaan iti: “Ni Erasto, procurador [ken] aedile (opisial a mangtartarawidwid iti ar-aramid maipaay iti publiko), insaadna daytoy a dappat a bukodna ti gastos.” Nupay saan nga ammo no daytoy ti Erasto a dinakamat ni Pablo, maipagarup nga addan daytoy a dappat idi umuna a siglo K.P. Naisingasing a ti mayordomo ti siudad ket kadua met ni Pablo iti panagdaliasatna (kitaenyo ti Num. 1, iti ngato). Nupay kasta, yantangay narigat koma idi ken Erasto ti kumuyog ken Pablo ket kagiddan dayta tamingenna dagiti annongenna kas mayordomo ti siudad, dagidiay mangpabor iti daytoy a pakabigbigan kaaduanna a kunaenda a nagtakem ni Erasto iti daytoy a saad ti opisial iti nasapsapa a tiempo, ngarud isu tinukoy ni Pablo iti daytoy a titulo.