EVIL-MERODAC

[manipud Babiloniko a pagsasao, kaipapananna ti “Managdaydayaw ken Marduk”].

Ti ari ti Babilonia a simmukat ken Nabucodonosor iti trono idi 581 K.K.P. Iti tawen a panagbalinna nga ari, nangipakita ni Evil-merodac iti kinamanangngaasi ken Jehoiaquin nga ari ti Juda babaen ti panangluk-atna kenkuana manipud balay a pagikulongan. Napasamak dayta iti maika-37 a tawen ti pannakaidestiero ni Jehoiaquin idiay Babilonia. Isu impaayan ni Evil-merodac iti napaboran a saad a nangatngato ngem iti amin a dadduma pay nga ar-ari a nakautibo idiay Babilonia. (2Ar 25:27-30; Jer 52:31-34) Kunaen ni Josephus a ni Evil-merodac imbilangna ni Jehoiaquin kas maysa kadagiti kasingedan a gagayyemna.

Adda met arkeolohikal a pammaneknek maipapan ken Evil-merodac (Awil-Marduk, Amil-Marduk). Kas pagarigan, mabasa iti kitikit iti maysa a basehas a nasarakan iti asideg ti Susa: “Palasio ni Amil-Marduk, Ari ti Babilonia, anak ni Nabucodonosor, Ari ti Babilonia.” (Mémoires de la mission archéologique de Susiane, ni V. Scheil, Paris, 1913, Tomo XIV) Ni Berossus, nga inadaw ni Josephus, kunaenna a nagturay ni Evil-merodac iti dua a tawen. Ni Josephus a mismo ibagana nga isu nagturay iti 18 a tawen. Naipagarup a napapatay kas resulta ti maysa a panangisikat, ni Evil-merodac ket sinukatan ni Neriglissar (Nergal-sarezer). Awan mapagpannurayan a pammatalged kadagitoy a detalye.