AWAN AMANA NGA UBING
Gapu ta awan lalaki iti balay a mangsuporta kadakuada ken mangsalaknib kadagiti pagimbaganda, ti awan amana nga ubing, wenno ulila, ken ti balo a babai mabalin a nalaklaka nga agsagaba iti pannakairurumen ken rigat. Ngarud ti pagsayaatanda ket naikabilangan iti sidong ti Linteg, a nangipasigurado iti hustisia iti awan amana nga ubing, iti balo a babai, ken iti ganggannaet nga agnanaed ken inramanna met dagiti probision maipaay iti pannakataraonda. (Ex 22:22-24; De 24:17) Dagiti maadas a nabati iti talon, iti kayo nga olibo, ken iti kaubasan ket agpaay kadagitoy a napanglaw. (De 24:19-21) Naawisda a makipaset iti aglaplapusanan a tinawen a Piesta ti Panagurnong (Piesta dagiti Abong-abong), a bayat dayta mabalinda a tagiragsaken ti panagdadaya a karaman iti rambak. (De 16:9-14) Tunggal maikatlo a tawen, ti naisangsangayan nga apagkapullo a gagangay a kanen dagiti Israelita idiay Jerusalem maikabil iti las-ud ti ruruangan dagiti pagtaenganda a siudad. Manipud iti daytoy nga apagkapullo, ti awan amana nga ubing ket naikkan iti legal a karbengan a makibingay.—De 14:28, 29; 26:12, 13.
Kasano kapateg kadagiti adipen ti Dios ti naayat a pannakaseknan kadagiti ulila?
Yantangay nalaka a maliwayan dagitoy nga ulila ken awanan gaway, inaramat ni Jehova ti sasao nga “awan amana nga ubing” a mangiladawan iti rukod ti kinalinteg ti Israel wenno ti isisiasina iti dayta. Idi tagtagiragsaken ti nasion ti nasayaat a naespirituan a salun-at, naaywanan ti awan amana nga ubing. Idi naballikug ti hustisia iti daga, sigurado a mabaybay-an ti awan amana nga ubing, ket sintomas daytoy ti kinarinuker ti nasion. (Sal 82:3; 94:6; Isa 1:17, 23; Jer 7:5-7; 22:3; Eze 22:7; Zac 7:9-11; Mal 3:5) Ilunod idi ni Jehova dagidiay mangirurrurumen iti awan amana nga ubing. (De 27:19; Isa 10:1, 2) Deskribiren ni Jehova ti bagina kas Mannubbot (Pr 23:10, 11), Katulongan (Sal 10:14), ken Ama (Sal 68:5) ti kakasta. Isu Daydiay mangipakat iti panangukom maigapu kadakuada (De 10:17, 18), nga ipakitaanna ida iti asi (Os 14:3), pabang-aranna ida (Sal 146:9), ken taginayonenna ida a sibibiag.—Jer 49:11.
Ti maysa kadagiti tanda a pakabigbigan ti pudno a Kristianidad isu ti panangikabilangan kadagidiay naulila gapu ta naawananda iti asawa wenno nagannak. Isurat ni adalan a Santiago kadagiti Kristiano: “Ti porma ti panagdaydayaw a nadalus ken di natulawan iti panangmatmat ti Dios ken Amatayo isu daytoy: panangtaripato kadagiti ulila ken iti balo a babbai kadagiti rigatda, ken panamagtalinaed ti maysa iti bagina nga awanan mulit manipud iti lubong.”—San 1:27.
Ti Griego a sao maipaay iti ulila (or·pha·nosʹ) naaramat iti piguratibo a kaipapanan iti Juan 14:18 ken nagduduma ti pannakaipatarusna kas “nabaybay-an” (AS), “nakapimpiman” (Mo), “awanan gayyem” (AT), ken “ulila” (NW; Yg).