PAMULINAWEN

Nakatangtangken unay a bato, natangtangken ngem iti asero wenno landok. Kasta unay ti katangken daytoy a bato ta no mapagkinniras ti dua a pedaso, ta ti rissik a mapataud ket mabalin a pangrugian ti apuy. Iti piguratibo a pamay-an, tukoyen ti Biblia ti pamulinawen no ipagpaganetgetna dagiti kualidad a kas iti kinatangken, kinalagda, ken panangdaer iti ibubusor.​—Isa 5:28; 50:7; Eze 3:9.

Masarakan ti pamulinawen kadagiti naurnong nga apug a batbato ken tisa idiay Israel ken iti makin-amianan a Peninsula ti Sinai. Nakarasrasi daytoy, ket no maburak sumilap dagiti natikap a pasetna. Nakatadtadem ti iking dagiti natikap a pasetna, ti kalidad a dagus a nabigbig ken inusar ti tao. Idi pay un-unana a tiempo, daytoy a bato ti naaramid nga imuko, ulo ti wasay, paet, ulo ti pika, tirad ti pana, ken dadduma pay a rimienta ken igam. Pamulinawen ti inaramat ti asawa ni Moises idi kinugitna ti anakna; kasta met nga idi nakadanon ti nasion ti Israel idiay Gilgal, sibaballigi a naaramid ti panagkugit babaen kadagiti imuko a pamulinawen. (Ex 4:25; Jos 4:19; 5:2, 3, 8, 9) Idiay let-ang, nangpataud ni Jehova iti danum manipud iti dakkel a pimmamulinawen a bato maipaay iti ilina.​—De 8:15; Sal 114:8.