AGAY-AYWAN ITI RUANGAN
Kadagidi kadaanan a tiempo, dagiti agay-aywan iti ruangan nagserbida iti nadumaduma a disso, kas iti ruruangan ti siudad, ruruangan ti templo, uray pay kadagiti pagserkan wenno ruangan dagiti pagtaengan. Dagiti agay-aywan kadagiti ruangan ti siudad nadutokanda a mangsigurado a naserraan dagiti ruangan iti rabii, ket nagakemda kas agbambantay iti ruangan. Ti dadduma nga agbambantay mabalin a naisaadda kas managwanawan iti rabaw ti ruangan wenno iti maysa a torre a sadiay maaddaanda iti nawayang a buya ken mabalin a maipakaammoda dagidiay sumungsungad iti siudad. Nakitinnulongda iti agay-aywan iti ruangan. (2Sm 18:24, 26) Responsable unay a saad dayta, yantangay ti kinatalged ti siudad dakkel ti panagpannurayna iti agay-aywan iti ruangan ket isu maysa nga instrumento ti komunikasion iti nagbaetan dagidiay adda iti ruar ti siudad ken dagidiay adda iti uneg. (2Ar 7:10, 11) Dagiti agay-aywan-iti-ruangan ni Ari Asuero, a ti dua kadakuada insikatda ti panangpapatay kenkuana, naawaganda met iti opisial ti palasio.—Est 2:21-23; 6:2.
Iti Templo. Sakbay unay ti ipapatayna, naan-anay nga inorganisar ni Ari David dagiti Levita ken dagiti trabahador ti templo, agraman dagiti agay-aywan iti ruangan, nga uppat a ribuda. Sigun kadagiti bennegda, sumrekda iti pito nga aldaw iti maysa a gundaway. Pagrebbenganda a bantayan ti balay ni Jehova ken siguraduen a maluktan ken maserraan dagiti ruangan kadagiti umiso a tiempo. (1Cr 9:23-27; 23:1-6) Malaksid iti panagannong kas guardia, ti sumagmamano inaywananda dagiti kontribusion nga inserrek dagiti umili maipaay a maaramat iti templo. (2Ar 12:9; 22:4) Iti maysa a naud-udi a tiempo, idi a ni Jehoiada a nangato a padi pinulotanna ni Jehoas kas ari, adda dagiti naisangsangayan a guardia a nadutokan kadagiti ruangan ti templo tapno salaknibanda ti ubing a ni Jehoas manipud iti manangagaw a ni Reyna Athalia. (2Ar 11:4-8) Idi dinadael ni Ari Josias ti idolatroso a panagdaydayaw, timmulong dagiti agay-aywan iti ruangan iti panangikkat manipud iti templo kadagiti aruaten a naaramat iti panagdaydayaw ken Baal. Kalpasanna napuoran dagitoy iti ruar ti siudad.—2Ar 23:4.
Idi adda ni Jesu-Kristo ditoy daga, nadutokan ti papadi ken dagiti Levita kas agay-aywan iti ruangan ken agbambantay iti templo nga imbangon manen ni Herodes. Nakalikaguman nga agalibtak dagitoy, ta agronda ti manangaywan wenno opisial ti nagsaadan ti templo, nga agparang kadagiti oras a di naipakpakauna, ket nasken a ti agbambantay patinayon a siririing iti puestona tapno saan a matiliwan a di sipupuot. Adda sabali pay nga opisial a nangimaton iti panagbibinnunot maipaay kadagiti panagserbi iti templo. No dumteng ken agtuktok iti ruangan, nasken a siririing ti guardia tapno ilukatanna. Kasta met, mabalin a matiliwanna a matmaturog ti guardia. Maipapan iti daytoy a kasasaad a siririing, kuna ti Mishnah (Middot 1:2): “Ti opisial ti nagsaadan ti templo, nga adda sumsumged nga al-aluten iti sangona, sursorenna idi ti tunggal agbambantay, ket no ti asinoman nga agbambantay saan a tumakder ket kunaenna kenkuana, ‘O opisial ti nagsaadan ti templo, talna koma kenka!’ ket nabatad a matmaturog, isu pang-oren [ti opisial] babaen iti sarukodna, ket adda idi kalinteganna a mangpuor iti kawes [ti agbambantay].”—Impatarus ni H. Danby; kitaenyo met ti Apo 16:15.
Dagitoy nga agay-aywan iti ruangan ken guardia naipuestoda kadagiti pagsaadanda tapno saluadanda ti templo manipud panagtakaw ken tapno paruarenda amin a narugit a tattao ken amin a managbasak nga awan masnup nga aramidenda sadiay.
Kadagiti Pagtaengan. Idi kaaldawan dagiti apostol, ti sumagmamano a pagtaengan addaanda kadagiti agay-aywan iti ruangan. Iti balay ni Maria nga ina ni Juan Marcos, maysa nga adipen a babai a managan Roda ti simmungbat iti panagtuktok ni Pedro idi nagsubli manipud pagbaludan kalpasan ti panangluk-at kenkuana ti maysa nga anghel. (Ara 12:12-14) Ti babai a napagserbi kas agay-aywan iti ruangan iti pagtaengan ti nangato a padi inimtuodanna ni Pedro no maysa kadagiti adalan ni Kristo.—Jn 18:17.
Papastor. Ti papastor kadagidi tiempo ti Biblia pinagtalinaedda dagiti arban ti karneroda kadagiti pakayaponan, wenno kulongan, dagiti karnero bayat ti rabii. Dagitoy a pakayaponan dagiti karnero buklen ti nababa a pader a bato nga addaan iti pagserkan. Dagiti arban ti maysa a tao wenno, no dadduma, ti sumagmamano a tattao, mapagtalinaed iti pagyaponan bayat ti rabii nga adda agay-aywan iti ruangan a mangbantay ken mangsalaknib kadakuada. Nalawag a daytoy a kaugalian ti inaramat ni Jesus kas pangngarig idi dinakamatna ti maysa nga agay-aywan iti ruangan iti panagsaona maipapan iti bagina saan laeng a kas pastor dagiti karnero ti Dios no di ket kas ruangan met a mabalin a sumrekan dagiti karnero.—Jn 10:1-9.
Dagiti Kristiano. Impaganetget ni Jesus a kasapulan nga agtultuloy nga agalibtak ken agbantay dagiti Kristiano mainaig iti iyaayna kas manangdusa ni Jehova. Ti Kristiano inyarigna iti agay-aywan iti ruangan a binilin ni apona nga agtultuloy nga agbantay ken mangsapul kenkuana iti isusublina manipud panagdaliasat iti sabali a daga.—Mr 13:33-37; kitaenyo ti GUARDIA; RUANGAN, PAGSERKAN.