GOBIERNO

Ti addaan autoridad a panangiturong ken panangtengngel kadagiti tignay ti tattao kadagiti komunidad, kagimongan, ken estado. Kasta met, ti persona, bagi dagiti persona, wenno dagiti organisasion a mangbukel iti manarawidwid nga autoridad.

Iti Kristiano a Griego a Kasuratan dagiti porma ti sao nga ar·kheʹ (punganay) nagduduma ti pannakaipatarusda kas “dagiti pagturayan,” “dagiti gobierno,” “agtuturay,” “dagiti Soberano.” (KJ; Dy; NW; AT; JB) Ti ky·berʹne·sis ken ky·ri·oʹtes, naipatarus a “gobierno” iti sumagmamano a patarus, ad-adda nga umiso a kaipapananna ti “panangiturong [panangibagnos wenno panangiwanwan]” maipaay iti ky·berʹne·sis ken “kinaapo” maipaay iti ky·ri·oʹtes. Iti Hebreo a Kasuratan, ti “gobierno” isu ti Iloko a termino a no maminsan maar-aramat a pangipatarus iti mem·sha·lahʹ, ‘pagturayan’ (Isa 22:21), ken mis·rahʹ, ‘pagturayan’ wenno “naprinsipean a panagturay [wenno pannakabalin].”​—Isa 9:6.

Ipalgak ti Biblia nga adda di makita a gobgobierno a nasasayaat, impasdek ti Dios (Efe 3:10), ken dagidiay a nadangkes, impasdek ni Satanas ken dagiti sairona. (Efe 6:12) Ni Jesu-Kristo idi ti aktibo nga ahente ti Dios iti orihinal a panangipasdek iti amin a nalinteg a gobierno ken autoridad, di makita ken makita. (Col 1:15, 16) Insaad ni Amana a Jehova kas ulo ti isuamin a gobierno (Col 2:8-10), ket isu masapul nga agturay agingga a maiyeg iti pannakapukaw ti amin a bumusbusor a gobierno, di makita ken makita. (1Co 15:24) Impatuldo ni apostol Pablo nga adda umay a sistema ti bambanag nga iti dayta adda maysa a gobierno iti sidong ti autoridad ni Kristo.​—Efe 1:19-21.

Gobgobierno ti Lubong. Ti Biblia iladawanna ti gobgobierno ti lubong kas “an-animal” ket kunaenna nga alaenda ti autoridadda manipud iti Dragon, ni Satanas a Diablo. Pinalubosan ida ti Dios nga agtalinaed ken kinednganna ti saklaw ken kapaut ti panagturayda, maitunos iti panggepna.​—Da kap 7, 8; Apo kap 13, 17; Da 4:25, 35; Jn 19:11; Ara 17:26; 2Co 4:3, 4; kitaenyo ti AN-ANIMAL, SIMBOLIKO NGA.

Dagiti Kristiano ken Gobgobierno. Ni Jesu-Kristo ken dagidi nagkauna a Kristiano saanda a nakibiang iti natauan a gobgobierno idi kaaldawanda. (Jn 6:15; 17:16; 18:36; San 1:27; 4:4) Binigbigda ti kinapudno a ti sumagmamano a kita ti gobierno ket nasken maipaay iti agtultuloy a kaadda ti kagimongan, ket saanda a pulos nangrubrob iti rebolusion wenno sibil a kinasukir. (Ro 13:1-7; Tit 3:1) Impasdek ni Jesus ti mangibagnos a prinsipio a suroten dagiti pudno a managdaydayaw iti Dios idi a kinunana: “Ngarud, ibayadyo ken Cesar ti bambanag ni Cesar, ngem iti Dios ti bambanag ti Dios.” (Mt 22:21) Daytoy a prinsipio ket timmulong kadagiti nagkauna a Kristiano (ken kadagiti Kristiano nanipud idin) a mangtaginayon iti umiso a kinatimbeng maipapan kadagiti pannakinaig iti dua nga autoridad, autoridad ti sibil a gobgobierno ken autoridad ti Dios. Impakita pay ni Jesus a ti takderna bayat ti kaaddana ditoy daga, ket ngarud takder dagiti adalanna, ket saan a ti pannakilaban iti “Cesar” a gobgobierno ngem, imbes ketdi, ti panangannurot kadagiti alagadenda a saan a nakibinnusor iti linteg ti Dios. Binigbig a mismo ni Pilato daytoy a kinapudno idi kinunana: “Awan masarakak a biddut kenkuana.” (Jn 18:38) Tinulad dagiti apostol ti ulidan ni Jesus.​—Ara 4:19, 20; 5:29; 24:16; 25:10, 11, 18, 19, 25; 26:31, 32; kitaenyo ti NANGATNGATO NGA AUTORIDAD; PAGARIAN.