ASO A PAGANUP

[Heb., zar·zirʹ moth·naʹyim].

Nasiglat unay, natadem-panagkitana nga aso, nga addaan iti natirad a sungo, narapis a naannayas a bagi, ken atiddog, natibker a saksaka. Nupay kasta, adda kalalainganna a di kinasigurado no ania ti tuktukoyen ti Hebreo a sao, a ti literal a kaipapananna ket “ti [animal a] nabariksan kadagiti padingpading (lomo).” Usaren ti adu a patarus ti Biblia ti “aso a paganup” iti kangrunaan a teksto iti Proverbio 30:31, ngem kadagiti footnote ilanadda ti “kabalio a pakigubat” ken “kawitan” kas kasukat a patarus. (AS, NW, Ro) Ti mabasa a “kawitan” (AT, Dy, JB, Kx, Mo, RS) patalgedan ti Griego a Septuagint ken ti Latin a Vulgate. Nupay kasta, ti “aso a paganup” ket maitutop a patarus ta mayanatup iti pannakailadawan ti maysa nga animal a nasayaat ti ‘panagaddangna.’ (Pr 30:29) Naorasan ti aso a paganup nga addaan iti kapardas nga agarup 64 km/oras (40 mko). Kasta met, ti kinarapis ti siket ti aso a paganup, a kasla ti animal “nabariksan kadagiti padingpading,” tumunos iti maibilbilang a literal a kaipapanan ti Hebreo nga awag.