HALLELUJAH

Letra-por-letra a patarus ti Hebreo a sasao a ha·lelu-Yahʹ, a damo nga agparang iti Salmo 104:35. Iti Baro a Lubong a Patarus gistay kanayon a naipatarus nga “idaydayawyo ni Jah.” Ti sasao agparang iti 24 a daras iti Hebreo a Kasuratan ken, malaksid iti Salmo 135:3 (“idaydayawyo ni Jah,” NW), iruanganna ken/wenno ipatinggana dagiti Salmo a pakasarakan iti dayta. (Kitaenyo ti Sal 112:1; 115:18; 146:1, 10; 147:1, 20; 148:1, 14; 149:1, 9; 150:1, 6.) Daytoy a sasao naipakuyog iti “Amen” iti pagnguduan ti Maikapat a Libro ti Salmo (Sal 106:48), ket ti Griego a pormana uppat a daras nga agparang iti Apocalipsis 19:1-6, a nakatukoyan ti rag-o a mapaspasaran gapu iti pannakadadael ti Babilonia a Dakkel ken nainaig iti panangrugi ni Jehova nga agturay kas Ari.​—Kitaenyo ti JAH.