MARTILIO

Maysa a rimienta a maar-aramat a pagpukpok ken pagipalok; maysa a maso. Naaramat dagiti martilio iti panagipalok kadagiti lansa (Jer 10:4) ken kadagiti pasok ti tolda (Uk 4:21), iti panagtebbag iti batbato babaen ti maulit-ulit a panagpukpok, kasta met iti panangsukog ken panangpalanas iti batbato a pagbangon (1Ar 6:7), ken iti panangsukog iti metal, kas iti panagaramid kadagiti idolo.​—Isa 41:7; 44:12.

Ti nadumaduma a bambanag a naaramat kas ulo ti martilio ket mabalin a bato, metal, wenno kayo. Nalabit kayo daydiay martilio, wenno maso, nga inaramat ni Jael idi impalokna ti pasok ti tolda kadagiti pispis ni Sisera.​—Uk 4:21; 5:26.

Ti insawang ni Jehova a panangukom ket piguratibo a nayarig iti maysa a pagpanday a martilio a mangburak iti dakkel (wenno, “napasdok”) a bato. (Jer 23:29) Kasta met, iti ima ni Jehova, ti Babilonia ket kas ti maysa a pagpanday a martilio, a mangrumekrumek iti nasnasion ken pagpagarian.​—Jer 50:23; idiligyo ti Jer 25:8, 9, 17-26.