HANANI

[mabalin a napaababa a porma ti Hananias].

1. Maysa kadagiti 14 nga annak ni Heman. Babaen ti binnunot, nadutokan ni Hanani a mangidaulo iti maika-18 a bunggoy dagiti musikero iti santuario idi tiempo ni Ari David.​—1Cr 25:4-6, 9, 25.

2. Ti pumaparmata, wenno managsirmata, a nangbabalaw ken Ari Asa ti Juda gapu iti pannakialiansana iti ari ti Siria imbes nga agkammatalek ken Jehova, ken isu daydiay naikabil iti balay dagiti tul-ong gapu iti insawangna a namagrurod iti ari. (2Cr 16:1-3, 7-10) Nabatad a ni Hanani ket ama ni Jehu, ti mammadto a nangbabalaw ken Baasa nga ari ti Israel ken ni Jehosafat nga ari ti Juda.​—1Ar 16:1-4, 7; 2Cr 19:2, 3; 20:34.

3. Maysa a padi iti “annak ni Immer” a karaman kadagidiay nangpapanaw iti ganggannaet nga assawada a babbai kas panagtungpal iti pammagbaga ni Esdras.​—Esd 2:36, 37; 10:10, 11, 20, 44.

4. Kabsat ni Nehemias. Idi tiempo ti iyaayna iti Susan, ni Hanani, agraman ti dadduma pay a lallaki ti Juda, pinakaammuanda ni Nehemias maipapan iti kasasaad ti pader ti Jerusalem. (Ne 1:2, 3) Kalpasan a nabangon manen ti pader, inkabil ni Nehemias ti kabsatna a ni Hanani ken kasta met ni Hananias a mangidaulo iti Jerusalem.​—Ne 7:1, 2.

5. Levita a padi ken musikero a nakipaset iti martsa nga inyurnos ni Nehemias idi inagurasion ti pader ti Jerusalem.​—Ne 12:31-36.