HANANIAS

[kaipapananna ti “Nangipaay ni Jehova iti Parabur; Nakaparparabur ni Jehova”].

1. Anak ni Sasac ken pannakaulo ti maysa a Benjamita a balay.​—1Cr 8:1, 24, 25, 28.

2. Maysa kadagiti 14 nga annak ni Heman ken pannakaulo ti maika-16 kadagiti 24 a bunggoy ti panagserbi a buklen dagiti Levita a musikero a dinutokan ni David nga agserbi iti santuario.​—1Cr 25:1, 4, 5, 8, 9, 23.

3. Nangato ti ranggona nga opisial, “prinsipe,” iti buyot ni Ari Ozias.​—2Cr 26:11.

4. Ama ti Zedekias a maysa a prinsipe bayat ti panagturay ni Jehoiaquim nga ari ti Juda.​—Jer 36:12.

5. Anak ni Azur; ulbod a mammadto manipud Benjamita a siudad ti Gabaon a nangbusor ken Jeremias a mammadto ni Jehova. Idi tiempo ti panagturay ni Ari Zedekias ti Juda, bayat nga iparparegta ni Jeremias kadagiti umili nga iyegda dagiti tengngedda iti sidong ti sangol ti ari ti Babilonia ket iti kasta agtultuloyda nga agbiag (Jer 27:12-14), impadto ni Hananias a maburak ti pannakabalin ti Babilonia iti las-ud ti dua a tawen, a maluk-atan dagiti destiero a Judio sadiay, ket maisubli amin dagiti naala nga aruaten iti templo. Tapno mayilustrarna ti puntona, inikkat ni Hananias ti kayo a sangol iti tengnged ni Jeremias ket tinukkolna dayta. Idin, ni Jehova imbilinna ken Jeremias nga ipakaammona ken Hananias a ti barra ti sangol a kayo masapul a masuktan iti sangol a landok ket ti ipapatay ni Hananias mapasamak iti las-ud dayta a tawen. Maitunos iti padto, natay ti ulbod a mammadto iti dayta a tawen.​—Jer 28.

6. Nalabit ti apong ni Irias nga opisial iti ruangan ti Benjamin a nangkemmeg ken mammadto Jeremias. Nangidatag iti ulbod a pammabasol a ni Jeremias ganggandatenna ti pumanaw a kumappon kadagiti Caldeo.​—Jer 37:1-15.

7. Ti Hebreo a nagan ni Sidrac, maysa kadagiti tallo a Judio a kakadua ni Daniel a naipan idiay Babilonia idi 617 K.K.P.​—Da 1:6, 7; kitaenyo ti SIDRAC.

8. Anak ni Zorobabel ken ama da Pelatias ken Jesaias.​—1Cr 3:19, 21.

9. Maysa a kaputotan ni Bebai a karaman kadagidiay nangipangag iti pammagbaga ni Esdras a papanawenda ti ganggannaet nga assawada a babbai.​—Esd 10:10, 11, 28, 44.

10. Levita a padi ken pannakaulo iti sangakabbalayan ni Jeremias iti dasig ti amana bayat ti kinagobernador ni Nehemias.​—Ne 12:12, 26.

11. Kameng dagiti managlaok iti sapsapo a nangaramid iti panagtarimaan iti pader ti Jerusalem idi tiempo ni Nehemias.​—Ne 3:8.

12. Anak ni Selemias; maysa a nakipaset iti panangtarimaan iti pader ti Jerusalem idi 455 K.K.P.​—Ne 3:30.

13. Padi a tumutrumpeta a nakiraman kadagiti seremonia nga inyurnos ni Nehemias idi inagurasion ti pader ti Jerusalem.​—Ne 12:31, 40, 41.

14. Maysa kadagiti pannakaulo dagiti umili a ti kaputotanna, no saan nga isu a mismo, pinatalgedanna​—babaen iti selio​—ti “mapagpiaran nga urnos” a nabukel bayat ti kinagobernador ni Nehemias.​—Ne 9:38; 10:1, 14, 23.

15. Ti prinsipe ti Kastilio, maysa a mapagpiaran a lalaki a ti panagbutengna iti Dios ket ad-adda ngem ti adu a sabsabali pay. Isu, agraman ni Hanani, inkabil ni Nehemias a mangituray iti Jerusalem.​—Ne 7:2.