HARIM

[Naikeddeng; Naiparit].

1. Aaroniko a padi a, babaen iti binnunot, napili a mangidaulo iti maika-3 kadagiti 24 a benneg ti papadi nga inorganisar ni David. (1Cr 24:1, 3, 7, 8) Ti “annak [wenno kapkaputotan] ni Harim” ket nadakamat a karaman kadagiti papadi kalpasan ti pannakaidestiero: 1,017 ti nagsubli manipud Babilonia idi 537 K.K.P. (Esd 2:1, 2, 36, 39; Ne 7:42) Ni Adna ti pannakaulo daytoy a balay dagiti amma iti simmaganad a kaputotan. (Ne 12:12, 15) Lima kadagiti “annak ni Harim” ti nangala iti ganggannaet nga assawa a babbai ngem pinagtalawda ida kas panangipangag iti pammagbaga ni Esdras nga aramidenda ti kasta. (Esd 10:10, 11, 21, 44) Maysa a pannakabagi ti pamilia (wenno mabalin a maysa kadakuada a kasta met laeng ti naganna) ti nangsuporta iti tulag ti kinamatalek kalpasan ti idadateng ni Nehemias idi 455 K.K.P.​—Ne 9:38; 10:1, 5, 8.

2. Ti namunganay iti maysa a pamilia a saan a papadi, a ti 320 kadakuada ket nakipagsubli ken Zorobabel idiay Jerusalem manipud Babilonia. (Esd 2:1, 2, 32; Ne 7:35) Kas kadagiti kameng ti padi a pamilia daydiay kasta met laeng ti naganna (Num. 1), walo a kaputotan daytoy a Harim ti nangala met iti ganggannaet nga assawa a babai, ngem pinapanawda ida. (Esd 10:25, 31, 32, 44) Kasta met, ti pannakabagida pinatalgedanna ti “mapagpiaran nga urnos” a naipasdek bayat ti kinagobernador ni Nehemias. (Ne 9:38; 10:1, 14, 27) Ti maysa nga “anak” ni Harim, ni Malkias, timmulong a mangtarimaan iti pader ti Jerusalem.​—Ne 3:11.