MALKIAS
[Ti Arik Isu ni Jehova].
1. Levita a nagtaud ken Gersom ken maysa nga inapo ti Levita a musikero a ni Asaf.—1Cr 6:39-43.
2. Maysa a kaputotan ni Aaron ken pannakaulo ti maika-5 iti 24 a benneg ti papadi nga inorganisar ni David.—1Cr 24:1, 9.
3. Maysa a padi ken ama ni Pasur.—1Cr 9:12; Ne 11:12; Jer 21:1; 38:1.
4. “Anak ti ari” nga iti pagurnonganna ti danum ti nakaipisokan ni Jeremias. (Jer 38:6) Iti daytoy a kasasaad, ti sasao nga “anak ti ari” saanna nga ipasimudaag nga isu maysa a putot ti ari no di ket mabalin a nasinged ti pannakainaigna iti naarian a sangakabbalayan wenno isu maysa nga opisial a naarian ti nagtaudanna.—Kitaenyo ti JERAMEEL Num. 3.
5. Maysa nga Israelita “iti annak ni Paros” a karaman kadagidiay nangawat iti ganggannaet nga assawa a babbai ngem nangpapanaw kadakuada idi kaaldawan ni Esdras.—Esd 10:25, 44.
6. Sabali pay nga Israelita “iti annak ni Paros” a karaman kadagidiay namagtalaw iti ganggannaet nga assawada a babbai. (Esd 10:25, 44) Iti Griego a Septuagint, “Hasabias” ti mabasa ditoy imbes a “Malkias.”
7. Maysa a lalaki ti Israel “iti annak ni Harim” a karaman kadagidiay namagtalaw iti ganggannaet nga assawa a babai ken annak idi tiempo ni Esdras.—Esd 10:31, 44.
8. Israelita, “anak ni Harim.” Kaduana ni Hassub, tinarimaanna ti maysa a benneg ti pader ti Jerusalem ken ti Torre dagiti Paglutuan nga Urno kalpasan ti panagsubli manipud pannakaidestiero idiay Babilonia. (Ne 3:11) Mabalin nga isu met laeng ti Num. 7.
9. Anak ni Recab ken prinsipe iti distrito ti Bet-haquerem a nangtarimaan iti Ruangan dagiti Gabsuon a Dapo bayat ti kinagobernador ni Nehemias.—Ne 3:14.
10. Kameng ti gunglo dagiti agpampanday iti balitok a nangtarimaan iti maysa a paset ti pader ti Jerusalem idi kaaldawan ni Nehemias.—Ne 3:31.
11. Padi a nagtakder iti makannigid ni Esdras idi a ti managkopia imbasana ti Linteg iti sanguanan dagiti Israelita iti naipasdek manen a Jerusalem.—Ne 8:4.
12. Maysa kadagiti papadi, wenno inapo ti maysa a padi, a nangpatalged babaen iti selio iti “mapagpiaran nga urnos” bayat ti kinagobernador ni Nehemias.—Ne 9:38–10:3.
13. Padi a nakipaset kadagiti seremonia ti inagurasion maipaay iti pader ti Jerusalem a naibangon manen iti sidong ti panangimaton ni Nehemias. (Ne 12:40-42) Mabalin nga isu met laeng ti Num. 11.