HENA, II

[Heb., koʹpher].

Nababa a kayo a dagiti murdong ti sangana ket agpataud iti raay ti babassit a maris-krema a sabsabong nga uppat ti petaloda; ti napalalo nga ayamuomda pagaayat unay dagiti tattao iti Makintengnga a Daya. Masansan a ti maysa a bassit a sanga ti hena ket maikabil iti nareppet a sabsabong, ket dagiti babbai ikapetda dayta iti buokda ken iti barukongda. Idi nagkauna a tiempo, maar-aramaten ti hena kas kosmetiko.

Daytoy a nababa a kayo (Lawsonia inermis), nga agtubtubo pay laeng iti aw-away ken kabakiran ti Palestina, ket dumakkel agingga iti katayag nga agarup 4 m (13 pie). Nadakamat laeng dayta iti Kanta ni Solomon (1:14; 4:13; 7:11).

Ti napalet a masa a hena, a naaramid manipud namekmek a bulbulong ti mula, ket maar-aramat kas kosmetiko. No mabalnawan daytoy a napalet a masa, agtalinaed ti kadawyanna a kolor kahel wenno lumabaga a marisna. Naar-aramaten ti hena a pangkolor kadagiti kuko ti ramramay ti ima ken saka, murdong ti ramay, im-ima, ken saksaka, kasta met a pangtina iti barbas, buok, ken uray kadagiti burbor ken ipus dagiti kabalio, kasta met kadagiti kudil ken lalat. Ti Hebreo a ramut a sao a maipagarup a nakaadawan ti koʹpher ket nadepinar kas “kalupkop,” agparang a mangipasimudaag iti usarna kas tina.​—Idiligyo ti Ge 6:14.