UGSA, KABAIAN NGA

[Heb., ʼai·ya·lahʹ; ʼai·yeʹleth].

Ti babai nga ugsa; kameng ti Cervidae a pamilia. Ti kabaian nga ugsa ket narapis, naimnas a parsua, naaripapa, nasiglat kadagiti bakras, ken napardas. No umadanin ti panaganak dagiti kabaian nga ugsa, agpaknida kadagiti nalmeng a paset ti kabakiran tapno agpasngayda ket kalpasanna agtultuloyda nga agputputong, a sidudungngo nga aywanan ken salaknibanda dagiti urbon agingga iti tiempo a kabaelandan nga aywanan ti bagbagida.​—Job 39:1; Sal 29:9.

Ti naalumamay ken naimnas a kabaian nga ugsa ket naitampok iti nabiag a panangiladawan ti Biblia. (Pr 5:18, 19; Sol 2:7; 3:5; kitaenyo ti GASELA.) Naiparipirip ti kinapardas ti animal ken ti kinasiglatna kadagiti bakras, a mamagbalin a posible ti ilalapsutna manipud kabkabusorna. (2Sm 22:1, 34; Sal 18:32, 33; Hab 3:19) Kinasigo ken kinasiglat iti pannakigubat ti mabalin a tuktukoyen ni Jacob idi naimpadtuan nga inladawanna ti tribu ni Neftali kas “maysa a narapis a kabaian nga ugsa.” (Ge 49:21) Ti salmista, idi nalapdan a siwayawaya a sumrek iti santuario, impadisna ti panangil-iliwna iti Dios iti panangil-iliw ti kabaian nga ugsa kadagiti waig ti danum. (Sal 42:1-4) Ti panangpanaw ti maysa a kabaian nga ugsa iti kayan-anak nga urbonna, a maisupadi unay iti pagaammo a panangyalikakana iti anakna iti sidong dagiti gagangay a kasasaad, ket mangipasimudaag iti kinakaro dagiti tikag iti Juda.​—Jer 14:1, 2, 5.