HOR-HAGIDGAD

Disso a nagpakarsuan dagiti Israelita idiay let-ang. Kas naisalaysay iti sidong ti paulo a BENE-JAACAN, kasla ipasimudaag ti panangidilig iti Numeros 33:31-33 iti Deuteronomio 10:6, 7 a namindua a limmasat dagiti Israelita iti daytoy a rehion, a ti Hor-hagidgad ket naawagan iti “Gudgoda” iti naud-udi a panagdaliasat. (Kitaenyo ti GUDGODA.) Saan a masigurado no sadino ti eksakto nga ayanna. Nupay kasta, kunaen ti kaaduan nga eskolar a ti Hor-hagidgad (Gudgoda) ket isu ti maysa a disso iti Wadi Khadakhid, agarup 65 km (40 mi) iti amianan nga amianan-a-laud ti Gulpo ti ʽAqaba, nupay saanda a sigurado.