HUL

Anak ni Aram. (Ge 10:23) Nupay kasta, agparang a nailista ni Hul kas anak ni Sem iti 1 Cronicas 1:17. Iti Alexandrine Manuscript ken iti Hebreo a manuskrito a Kennicott 175, agpada ti nailanad iti 1 Cronicas 1:17 ken iti Genesis 10:23, a naglaon iti sasao a “ket ti annak ni Aram” sakbay a nailista ti nagnagan nga Uz, Hul, Geter, ken Mas. Gapuna, mabalin a biddut ti eskriba ti pannakaikkat ti sasao a “ket ti annak ni Aram” iti 1 Cronicas 1:17 iti Masoretiko a teksto. Ngem saan a kanayon a kastoy ti kaso; iti Kasuratan, ti “annak” mabalin a ramanenna dagiti appoko ken uray pay dagiti naud-udi a kaputotan. (Maipaay iti umasping a kasasaad, kitaenyo ti 1Cr 1:4, a sadiay a da Sem, Ham, ken Jafet ket saan a nadakamat kas annak ni Noe, nalabit gapu ta pagaammo unay ti pannakainaigda ken Noe, iti kasta inkeddeng ti orihinal a mannurat a saanen a kasapulan a tukoyenna ida.)

Saan a masinunuo ti ayan ti lugar a nagnaedan dagiti kaputotan ni Hul. Ni Josephus kunaenna a ni Hul (Urus) ti namunganay iti Armenia. (Jewish Antiquities, I, 145 [vi, 4]) Isingasing ti dadduma a nagyan dagiti kaputotan ni Hul iti luglugar ti Mesopotamia ken iti sabsabali pay. Adu ti mangpabor iti rehion ti Hula iti aglawlaw ti Biblikal a dandanum ti Merom a nagsaad iti amianan ti Baybay ti Galilea, yantangay ti nagan a Hul kasla nataginayon iti “Hula” ken kasta met iti “Ulatha,” maysa a rehion a dinakamat ni Josephus.​—Jewish Antiquities, XV, 360 (x, 3).