MAS

Kaputotan ni Sem babaen ken Aram. (Ge 10:22, 23; 1Cr 1:17, Sy ken ti innem a Heb. a manuskrito) Iti 1 Cronicas 1:17 iti Masoretiko a teksto, mabasa ti “Mesec” imbes a “Mas.” Ngem nalabit maysa daytoy a biddut ti eskriba, yantangay ni Mesec ket nailista kas ‘anak’ ni Jafet.​—Ge 10:2; 1Cr 1:5.

Sigun iti dadduma, ni Mas ken dagiti kaputotanna ket nainaig iti Mons Masius, maysa a kabambantayan iti makin-amianan a Mesopotamia a dinakamat ti Griego a geograpo a ni Strabo. (Geography, 16, I, 23) Ti dadduma inaigda ti “Mas” iti maysa a paset ti desierto ti Siria-Arabia a naawagan “(pagilian ti) Mas” a nailanad kadagiti rekord ti pakasaritaan ti Asiria ken nadeskribir kas “desierto a pakariknaan iti kasta unay a waw, awan sadiay ti aniaman a tumatayab iti tangatang ken uray dagiti atap nga asno (wenno) dagiti agar-arab a gasela.”​—Archaeology and the Old Testament, ni M. F. Unger, 1964, p. 98; Ancient Near Eastern Texts, inurnos ni J. B. Pritchard, 1974, p. 299.