JASON

[mabalin a nagtaud iti sao a kaipapananna ti “paimbagen”].

Maysa a Kristiano a nalatak idiay Tesalonica a ‘nangawat kada Pablo ken Silas buyogen ti kinamanagpadagus’ bayat ti umuna a panagbaniagada nga agturong idiay Macedonia. Ti maysa a bunggoy dagiti gumurgura a Judio ginandatda nga alaen da Pablo ken Silas manipud balay ni Jason, ngem idi saanda a nasarakan ida sadiay, innalada ketdi ni Jason ket isu ti kangrunaan nga inakusaranda iti panagalsa maibusor ken Cesar. Naluk-atan ni Jason ken ti dadduma pay a kakaduana kalpasan a nangtedda iti “umdas a tani,” nalabit babaen iti panagpiansa.​—Ara 17:5-10.

Iti surat ni Pablo kadagiti taga Roma, nga inaramidna idiay Corinto iti simmaganad a panagdaliasatna iti Macedonia ken Grecia, maysa ni Jason kadagiti nangipatulod iti kablaaw. (Ro 16:21) No isu met laeng ti Jason idiay Tesalonica, nalawag a napan idiay Corinto, nalabit kas kadua ni Pablo. Isu naawagan a ‘kabagian’ ni Pablo, a mabalin a kaipapananna nga agkailianda, nupay ti kangrunaan a kaipapanan ti Griego a sao ket “kabagian iti dara iti isu met laeng a kaputotan.” No isu ket asideg a kabagian ni Pablo, gagangay laeng nga isu ti pagyanan ni Pablo idiay Tesalonica.