JEDAIAS

Ti nakaipatarusan ti dua a Hebreo a nagan a nagduma ti ispeling ken kaipapananda.

[1, 2: Heb., Yedha·yahʹ]

1. Maysa a Simeonita a ti kaputotanna a ni Ziza ket panguluen idi nagturay ni Ezekias.​—1Cr 4:24, 37, 38, 41.

2. Maysa nga agtataeng iti Jerusalem kalpasan ti pannakaidestiero; tinarimaanna ti benneg ti pader ti siudad iti sanguanan ti balayna; anak ni Harumaf.​—Ne 3:10.

[3-8: Heb., Yedhaʽ·yahʹ, Ammo ni Jah]

3. Maysa a balay ti amma a nakaikamengan ti papadi; napili babaen ti panagbibinnunot nga agpaay a maika-2 kadagiti 24 a bunggoy ti papadi idi biningbingay ni David ti kinapadi.​—1Cr 24:1, 6, 7.

Nailista iti baba ti sumagmamano a papadi kalpasan ti pannakaidestiero a naawagan iti Jedaias, mabalin a dadduma kadakuada ket maymaysa a balay ti amma ti nakaikamenganda, ngem narigat nga ammuen no kasta nga agpayso.

4. Maysa a padi, wenno mabalin a dagiti nadakamat iti ngato a kameng ti balay ti amma a nagnaed idiay Jerusalem kalpasan ti isusubli manipud Babilonia. Iti Nehemias 11:10, mabalin nga innayon ti managkopia ti awag ken Jedaias nga “anak ni” Joiarib, kas ipasimudaag ti panangidilig iti 1 Cronicas 9:10. Ti Jedaias ken ti sabali pay a dua (ti Joiarib wenno Jehoiarib ken ti Jaquin) iti pangrugian dagiti listaan iti Nehemias ken Cronicas ket kapada ti nagnagan dagidiay kameng ti balbalay ti amma idi tiempo ni David. (1Cr 24:6, 7, 17) Gapuna mabalin a tumukoy laeng dayta iti balbalay ti amma, a mangipakita a nairepresentarda, idinto ta dagiti sumarsaruno a nagan ket agpaay kadagiti indibidual; wenno mabalin nga amin dagitoy ket nagnagan dagiti tattao a sibibiag idi.​—1Cr 9:10-12; Ne 11:10-13.

5. Inapo ti 973 a papadi a nagsubli a kadua ni Zorobabel manipud Babilonia. (Esd 2:1, 2, 36; Ne 7:39) Mabalin a dagitoy ket kameng ti maymaysa a balay ti amma (Num. 3), malaksid no ti panagbalinda a kameng “iti balay ni Jesua” ket tumukoy iti pannakainaigda iti linia ti nangato a padi.

6, 7. Nagan ti dua a papadi a nairaman iti listaan dagidiay nagsubli a kadua da Jesua ken Zorobabel idi 537 K.K.P. (Ne 12:1, 6, 7) Bayat ti kinapadi ti suno ni Jesua a ni Joiaquim, tunggal maysa kadakuada ket natukoy kas balay ti amma, a ni Uzzi ti nangirepresentar iti maysa idinto ta ni Netanel met ti sabali pay. (Ne 12:12, 19, 21) Saan a masinunuo no ti maysa kadagitoy a Jedaias wenno isuda a dua ket nainaig iti orihinal a balay ti amma (Num. 3).

8. Maysa kadagiti nagsubli manipud pannakadestiero, a naggapu kenkuana ti balitok ken pirak a naaramid a korona maipaay iti nangato a padi a ni Josue. (Zac 6:10-14) Saan a naibaga no isu ket nainaig iti papadi a nadakamaten.