NI JEHOVA A MISMO ADDA SADIAY

Daytoy a sasao ti pakaipatarusan ti Yehwahʹ Shamʹmah, a nayaplikar iti siudad a nakita ni mammadto Ezequiel iti sirmatana a nailanad iti kapitulo 40 agingga iti 48 iti librona. (Eze 48:35) Ti nasirmata a siudad ket nailadawan kas kuadrado (4,500 atiddog a kasiko iti maysa a sikigan [2,331 m; 7,650 pie]) ken addaan 12 a ruangan, a ti tunggal maysa addaan iti nagan ti maysa kadagiti tribu ti Israel. (Eze 48:15, 16, 31-34) Ti nasirmata a siudad iti padto ni Ezequiel ket agbalin a kukua ti “intero a balay ti Israel.” (Eze 45:6) Ti nagan a Jehova-Sammah, wenno “Ni Jehova a Mismo Adda Sadiay,” ipasimudaagna ti mangirepresentar a kaadda ti Dios kas ti nayebkas iti dadduma pay a teksto, kas ti Salmo 46:5; 132:13, 14; Isaias 24:23; Joel 3:21; ken Zacarias 2:10, 11, a sadiay ni Jehova, a ‘saan a malaon ti langit ti langlangit,’ ket naikuna a kasla agtataeng iti maysa a naindagaan a siudad wenno disso.​—1Ar 8:27; kitaenyo met ti PANGULUEN.