JEHOVA-SALOM

[Ni Jehova ket Talna].

Ti nagan a naited iti altar a binangon ni Gideon idiay Ofra iti laud ti Jordan. Kalpasan a nakitana ti anghel ni Jehova, nagbuteng ni Gideon amangan no matay. Ngem naipasigurado kenkuana: “Maaddaanka koma iti talna. Dika agbuteng. Saankanto a matay.” Kas panagyamanna, binangon ni Gideon ti altar, nabatad a saan a pagisakripisiuan, no di ket kas panglaglagip ken Jehova.​—Uk 6:22-24.